Şaredarîya Amedî ya Şaristanê Girdî, Taxa Yazikoyî ya Qezaya Karaz de "Şahîya Huner û Sporî ya Gedeyan" organîze kerd.
Serekîya Daîreya Xizmetê Sosyalî, Serekîya Daîreya Kultur û Karê Sosyalî û Serekîya Daîreya Xizmetê Ciwan û Sporî seba gedeyê ke dewan de ciwîyenê xebatanê xo dewam kenê. Na çarçewa de Taxa Yazikoyî ya Qezaya Karaz de "Şahîya Huner û Sporî ya Gedeyan" ame organîzekerdene. Şahîye ke Şaredarîya Karazî zî piştî daye, 600 gedeyî beşdar bîyî.
Aktivîteyan de atolyeyê rîtîmî, xebata resimî, pîngpong, basketbol, trambolîn, kayê aqil û hişî, musabeqayê keyf û aktîvîteyê sporî ameyî kerdene. Personelê Şaredarîya Şaristanê Girdî rîyê gedeyan boyax kerdî û înan reyde govende girewte.
Hemşaredarê Şaredarîya Karazî Roza Altindag û Mehmet Şik, aktivîteyan de gede û keyeyanê înan reyde eleqedar bîyî. Hemşaredaran gedeyan reyde govende girewte û boyax kerd.
Peynîya aktivîteyan de gedeyan rê dîyarî dayî û zaf tewir çî ameyî îkramkerdene.
'Gedeyî karê ma yê yewin o’
Hemşaredara Şaredarîya Karazî Roza Altindag seba aktivîte Şaredarîya Amedî ya Şaristanê Girdî rê sipas kerd û va: "Ma seba na aktivîte sipas kenê û wazenê ke nê tewir aktivîteyî dewam bikerê."
Gedeyî zî kêfweş bîyî û waşt ke aktivîteyî dewam bikerê. Nîsa Çali va "Mi resim viraşt, embazanê xo reyde kay kerd. Ez zaf kêfweş a." Elîf Başbug va ke aye basketbol kay kerdo û dima resim viraşto. Dîcle Acar zî va "Mi aktivîteyî zaf weş dîyî, ma reyna wazenê." Aram Firat Kiliç zî va "Mi resim viraşt, basketbol, tenîs û dart kay kerd, trambolîn de xo çing kerd."
Â