Awanîya xizmetî ya Şaredarîya Amedî ya Şaristanê Girdî de seba halêko muhtemel yê şewatî, bi esasanê peysnayîş, xelisnayîş, pawitiş û rewşa lezabeze tatbîqatê şewatî ame kerdene.

Şaredarîya Amedî ya Şaristanê Girdî, çarçewaya Qanûnê Weşîya Karî û Emnîyetî yê Nimreyê 6331î de, tatbîqatêko şewatî ke zaf nêzdîyê raştîye bî, awanîya xizmetî de kerd. Tatbîqat, Serekîya Daîreya Karê Weşîye Beşê Weşîya Karî û Emnîyetî, Serekîyanê Daîreya Îtfaîye û Karê Afate reyde, pîya ame kerdene.

Tatbîqatê şewatî, badê kombîyayîşê perwerde û agahdarîkerdişî ke Salonê Kombîyayîşê Meclîsê Şaredarîye de ame kerdene, saete 11.10 de dest pêkerd û teqrîben saetêk dewam kerd.

Tatbîqat hetê Sekreterê Pêroyî Gordukî ra ame îdarekerdene

Sekreterê Pêroyî yê Şaredarîya Şaristanê Girdî Emrullah Gorduk, sey mudirê rewşa lezabeze, tatbîqatê şewatî îdare kerd, Hetkarê Sekreterê Pêroyî Reşat Bakan, Ozgur Yildiz û Serekê Daîreya Karê Afate Azad Yildizî zî sey hetkarê mudirê rewşa lezabeze îdare kerd.

Tatbîqatî de ke serekê daîreyan ke awanîya xizmetî ya şaredarîye de bîyî, mudirîya ekîban kerd, ekîbê peysnayîş, xelisnayîş, pawitiş û rewşa lezabeze ke planê tahlîye û rewşa lezabeze de amebî tesbîtkerdene, xebitîyayî.

Personelî awanî ra vejîyayî

Tatbîqatî de goreyê senaryoyê ke hazir bîbî, tahlîyeya personelan ke awanî de bîyî, peysnayîşê şewatî, gêrayîş û xelisnayîş û mudaxeleyo verêne yê birîndaran ame kerdene, birîndarî bi sedye ameyî berdene. Erebeyê îtfaîye ke resayî herême, bi înan şewat ame peysnayene û kesê ke katan de bêçare mendbî, ê ameyî xelisnayene.