Konseya Bajarî ya Dîyarbekirî, ke awankerdişê Meclîsê Gedeyan îlan kerd Hemşaredara Şaredarîya Şaristanê Girdî Serra Bucak bale ante heqanê gedeyan ser û va "Heqê gedeyan est o ke vajê, fealîyetan awan bikerê, fikir awan bikerê û heme xebatan de ca bigîrê û beşdar bibê."

Konseya Bajarî ya Dîyarbekirî, seba ke beşdarîya aktîf a gedeyan cuya bajarî de destek bikero û Dîyarbekir bikero bajarekê dostê gedeyan Meclîsê Gedeyan awan kerd. Kombîyayîşê Meclîsê Gedeyan o Asayî yo 1. ke Merkezê Kultur û Kongreyê Çand Amedî de ame organîzekerdene, Hemşaredara Şaredarîya Şaristanê Girdî ya Dîyarbekirî Serra Bucak, hemşaredarê şaredarîyanê qezayan, gedeyê 9-15 serreyî û keyeyê înan û endamê Heyetê Îdareyî yê Konseya Bajarî beşdarê ci bîyî.

Dîwano ke ame awankerdene tede gedeyan ca girewt. Kombîyayîşî de gedeyanê ke derheqê amanc û hedefanê meclîsî de nirxandayîşî kerdî, îfade kerd ke ê awanbîyayîşê Meclîsê Gedeyan zaf keyfweş ê.

'Çîyê ke şima do vajê, do bibo destpêkê vurîyayîşî’

Metnê akerdişê kombîyayîşî Sekretera Pêroyî ya Konseya Bajarî Selvî Tunç wend. Tunç ke qeyd kerd ke ê ewro tîya seba meclîsêko zaf biheyecan pîya yenê têhet, va: "Pêro çîyê ke şima tîya vajê muhîm ê. Bê ke vajê gird yan şenik, pêro fikirê şima seba ma qîmetin ê. Fikrêk parekerdişê ey cesaret wazeno û şima ewro tîya nê cesaretî nîşan danê. Pêro çîyê ke şima seba ke şaristanê ma başêr bikê vajê, destpêkê vurîyayîşî yo.”

Hemşaredare Bucak: Bîyayîşê şima seba ma zaf qîmetin o

Hemşaredare Serra Bucak salone bi kurdkî û tirkî silam kerd û dest bi qiseykerdişî kerd. Hemşaredare Serra Bucak wina qisey kerd: "Tîyabîyayîşê şima seba ma zaf qîmetin o. Seba mi zî zaf heyecanêk o. Ez bi serranê dergan embazê gedeyan ê sey şima, emrê şima de xebitîyaya. Bi serranê dergan şaredarîyan de, sazgehanê gedeyan de, rêxistinanê gedeyan de şima reyde pîya, embazê şima ê sey şima reyde qadê heqanê gedeyan de û zaf qadanê bînan de xebitîyaya. Ewro ez zî wazena herkeso ke kede daya, Tora Heqanê Gedeyan ê Amedî, Torê Heqanê Gedeyan ê Dîyarbekirî rê zaf sipas kena. 

'Vatişê gedeyan lûtuf nîyo, heq o'

Hemşaredare Bucak ke derheqê îfadeyê "Vatişê gedeyan lûtuf nîyo, heq o" de ya ke metnê akerdişê kombîyayîşî de ca girewt, qisey kerd û va "Heqê gedeyan est o ke awan bikerê, fealîyetan bikerê, fikir awan bikerê û heme xebatan de ca bigîrê û beşdar bibê."

Hemşaredare Bucak gedeyan ra persa va "Ma nê heqî Dîyarbekirî de sey Meclîsê Gedeyan, sey Konseya Bajarî bi hemkarîye gird bikerê, şima soz danê?"  gedeyan va "Heya".