Şanoyê Şaristanî yê Şaredarîya Amedî ya Şaristanê Girdî (DBŞT), akerdişê sezonê şanoyî yê neweyî bi kayê “Moraşîn”î kerd.

Kayo ke tede nêzdîyê 50 kaykerî û danskerî ca gênê, Merkezê Kultur û Kongre yê Çand Amedî de ame sehnekerdiş û şanohesan reyde ame têhet.

Nuştox û rejîsorê kayî Ghotbedin Sadeghi yo. Kay, vatişê “Xelîlo Ciwan” ê destananê kurdan ra îlham girewt û eşq, fedakarî, xoverdayîş û elementê mîtolojîkî ardî sehne.

Badê kayî, Sereka Daîreya ma ya Kultur, Huner û Karanê Komelkîyan Zeynap Yaş kayker û ekîbî rê seba keda înan sipas kerd û bale ante muhîmîya ciwînayîşê huner, kultur û ziwanî ser o.

Programê DBŞT'yî yê aşma teşrîna verêne do bi kayanê Keçelok, Xewna Şeveke Havînê, Hişê min Tev Li Hev Bû û Romeo û Juliet (Niha çawa ye?) dewam bikero. Bilêtî Biletinial ser ra yenê girewtiş.