DÎSKÎ binawanîya awa şimitişî ya Tirbêsipî xurt kena
Mudirîya Pêroyî ya DÎSKÎ ya Şaredarîya Amedî ya Şaristanê Girdî Taxa Tirbêsipî ya qezaya Peyasî de dest bi xebatan kerd ke problemê awa şimitişî yê teqrîben 120 keyeyan rê çare bibo. Taxe de quleya awe ya bi kapasîteyê 100 metrekub û xeta terfî ya 130 metreyî yenê viraştiş.
Mudirîya Pêroyî ya Îdareyê Awe û Kanalîzasyonî yê Amedî (DÎSKÎ) Taxa Tirbêsipî de dest bi sermîyangozarîyêka newîye kerd ke binawanîya awa şimitişî ya ke bi zêdebîyayîşê nufusî bes nêkena, xurt bibo. Xebate çarçewaya projeyê “Karê Viraştişê Sondaj, ENH, Pompa, Depoyê Awa Şimitişî û Tesîsê Şebekeyî yê Cayanê Cîya-cîyayan ê Seranserê Amedî” de yena kerdiş ke DÎSKÎ seba taxanê dewan ramena û teqrîben 900 mîlyon TL yo.
Zêdebîyayîşê nufusî quleya awe ya nikayine kerde kêmî
Quleya awe ya ke hewceyîya taxe temîn kena, bi zêdebîyayîşê nufus û keyeyan serran mîyan de bes nêkerd. Bi taybetî aşmanê hamnanî de bikarardişo ke zêde bî, bî sebebê kêmanîya awe. Bi binawanîya newîye ya depokerdiş û şawitişî yeno amanckerdiş ke awa çimeyî hîna biserûber bireso taxe û hewceyîya ke zêde bena, bêra temînkerdiş.
Kapasîteyê depokerdişî yê 100 metrekubî do bêro îlawekerdiş
Bi xebata ke goreyê etudê warî û erjnayîşanê teknîkan ê Mudirîya Şûbeyê Sermîyangozarîye ya DÎSKÎ ameye plankerdiş, do taxe rê kapasîteyê depokerdişî yê 100 metrekubî bêro îlawekerdiş. Xeta terfî ya 130 metreyî do awa bîrê sondajî bişawo quleya newîye. Badê awankerdiş û girêdayîşî sîstem do dekewo falîyet.
Hewceyîya depokerdiş û şawitişî pîya yena erjnayîş
Kontrolkera projeyî, teknîkera xerîta Besra Memîş dîyar kerd ke birca awe ya newîye û xeta terfî do binawanîya awa şimitişî ya taxe xurt bikerê û wina vat: “Problemo ke Tirbêsipî de ciwîyeno, mojneno ke bi zêdebîyayîşê nufusî hewceyîya depokerdiş û şawitişî senî bedilîyena. Ma sîstemo ke çimeyê awe ra reseno taxe, goreyê nê hewceyîyan erjnenê. Berpirsîyarîya ma ya warî na ya ke projeyî goreyê hewceyîyanê teknîkan tatbîq bikerê û piştî bidê ke awe hîna biserûber bireso keyeyan.”
Şarê taxe xebatî erjnayî
Şarê taxe ra Îsmet Aktîkî dîyar kerd ke 7-8 serrî yo taxe de problemê awa şimitişî est o û wina vat: “Bi zêdebîyayîşê nufusî û viraştişê keyeyanê neweyan dewa ma de problemê awe vejîya meydan. Badê muracatanê ma, DÎSKÎ nika dest bi xebatan pêkerd. Bi nameyê dewa xo ma înan rê zaf sipas kenê. Ma texmîn kenê ke bi na xebate problemê awa dewa ma do çare bivîno. Ez heme kesan rê ke keda înan tede est a, sipas kena.”
Alî Çakarî zî memnûnîya xo îfade kerd û vat: “Dewa ma gird bîye, verê keyeyî tay bîyî. Wa DÎSKÎ û şaredarî weş bê. Seba ke na tengîye rê çare bibo, xebitîyenê. Înşela no derd do biqedîyo, awa ma do zaf bibo û qet tengîya ma do nêmano.”
Çarnayox: Mehmet Olmez
