Perwerdeyanê demê neweyî Kursanê Huner û Perwerdeyê Meslekî yê Amedî (DÎSMEK) de koordînasyonê Mudirîya Şûbeyê Perwerdeyê Meslekî de dest pêkerd ke girêdayeyê Serekîya Daîreya Xizmetanê Komelkî yê. Amanc o yo ke hemwelatî bibê wayîrê qabîlîyetanê meslekî, averşîyayîşê înan ê şexsî rê piştî bidîyo û beşdarê berhemdayîşê hunerî bibê.

Perwerdeyî do hîrê aşman dewam bikerê ke hetê perwerdekaranê pisporan ra merkezanê kursan ê Sumerpark û Goletlipark de yenê dayîş. Hemwelatîyê 17 serre û sereyî eşkenê rojanê hefteyî de saetanê 08.00–17.00 mabênê de beşdarê kursanê bêpereyan bibê.

Perwerdeyanê meslekî de sertîfîka do bêro dayîş

DÎSMEK de waranê werdpewjîye, pastakarîye, berberîya cinîyan, miqateyê çermî û rindîye, tekstîl, rayraberdoxê komputerî, dîksîyon, hunerê destan û verhesabdarî de perwerdeyê meslekî yenê dayîş. Kursîyerê ke nê perwerdeyan bi serkewtiş temam kenê do heqê sertîfîkaya MEB ra tesdîqkerdeye qezenc bikerê. Nînan ra teber beşanê resm, çînî, neqşê kerrayan, viraştişê kaykilanê darênan û perwerdeyê vengî/tenburî de kursê bi belgeya beşdarîye yenê organîzekerdiş.

'Ma piştî danê ke hemwelatî beşdarê berhemdayîşî bibê'

Serekê Daîreya Xizmetanê Komelkî Omer Samanî derheqê kursan de agahî da û vat ke perwerdeyî hem hunerê meslekî musnenê hem zî bi waranê hobîyan piştî danê cuya komelkî ya hemwelatîyan. Samanî dîyar kerd ke hemwelatîyê heme waranê komelî eleqe mojnenê kursan ke merkezê şaristanî û qezayan de ciwîyenê.

Samanî vat: “Sey Daîreya Xizmetanê Komelkî, seba têkoşînê vera feqîrîye ma piştî danê ke kesê komelê ma beşdarê xebatanê berhemdayîşî bibê. Ma wazenê ke bi serkewtişanê nê kursan zaf hemwelatîyê ma, seke verê zî bî, bi tayê meslekan reyde bêrê têhet.”

Samanî bale ante ser o ke Amed warê turîzmî de şaristanêko averşîyayox o û vat ke amancê înan o yo ke bi taybetî kursê werdpewjîye û pastakarîye piştî bidê îmkananê îstîhdamî yê Amedî. Ey dîyar kerd ke kursê cinîyan zî est ê.

Kursîyeran rê perwerdeyê dîjîtalî

Samanî vat ke hemwelatîyê ke beşdarê kursanê meslekî benê bi rayîrê Merkezê Dîjîtal ê Ciwanan perwerdeyanê dîjîtalan ra zî îstîfade kenê; perwerdeyê e-bazarî û verhesabdarî piştî danê kursîyeran ke karê xo yê xoserî akerê.

Seba seypêyîya cinsîyetê komelkî perwerdeyê hemparî

Samanî ard ziwan ke sere de Serekîya Daîreya Polîtîkayanê Cinîyan, daîreyanê cîyayan reyde xebatanê hemparan ramenê. Ey vat ke amancê înan o yo ke piştî bidê awankerdişê komelêkê demokratîkî ke bingeyê seypêyîya cinsîyetê komelkî ser o yo û hemwelatî cuya komelkî de hîna aktîf ca bigîrê.