Hemşaredarê Şaredarîya Amedî ya Şaristanê Girdî Serra Bucak û Emîn Ayî 75 karkerî zîyaret kerdî ke 8 rojî yo şantîyeyê Nêweşxaneyê Şaristanî de seba şertanê xebate û heqanê şexsîyan xover danê. Hemşaredaran venga berpirsîyaran da ke heqê sendîkayî yê karkeran bêrê pawitiş û waştişê înan bêrê ca.

Hemşaredaranê Şaredarîya Şaristanê Girdî Serra Bucak û Emîn Ayî endamanê meclîsî reyde 75 karkerê Sendîkaya Karkeranê Awanî û Rayîran (Yapı Yol-Îş) zîyaret kerdî.

Karkeran problemê xo ardî ziwan

Karkeran vat ke seba ke heqê xo yê sendîkayî xebitnenê, rastê teda, tehdît û heqaretan yenê û vera tehdîdê kar ra vetişî rî bi rî yê. Karkeran bale ante birnayîşanê bêheqan ê heqdestan û prîmanê SGK'yî ser o ke ser heqdestê raştikênî nêyenê dayîş. Înan seba mesaîya yewşemeyî, mesaîya zêde, emnîyetê karî, tazmînatê îhbarî û heqê rayîrî heqê xo yê qanûnî waştî.

Hemşaredare Bucak: Ma xespkerdişê heqan qebul nêkenê

Hemşaredare Bucak vat: “Ma qet qebul nêkenê ke barê problemanê nê awanî pişta karker û kedkaran ser o bimano û karker bi xespkerdişê heqan bêrê îdarekerdiş.” Bucak venga Wezaretê Xebate û Emnîyetê Komelkî û mufetîşan da û vat: “Ma sey Şaredarîya Şaristanê Girdî û DEM Partî hetê înan de yê. Eke firsendêka muzakereyî bêra dayîş, ma amade yê ke rol bigîrê.”

Hemşaredar Ay: Bêvengîye hemparîya sûcê îstîsmarî ya

Hemşaredar Ayî vat: “No xoverdayîş zaf erjaye û meşru yo. Bêvengîye hemparîya sûcê îstîsmarî ya. Eke na şaristan de no nêweşxane awan bîyo, bi keda karkeran awan bîyo. Ma sey îdareyê herêmkî karkeran reyde mil bi mil ê.”