Hemşaredara Şaredarîya Amedî ya Şaristanê Girdî Serra Bucak, çarçewaya Hewteyê Îtfaîya de kedkaranê îtfaîya û keyeyanê înan reyde ameye têhet.

Programî de Verfeka Meclîsê DBByî Demet Ceylan û Serekê Daîreya Îtfaîya Mehmet Candar zî hetê Bucak de bîyî.

Hemşaredara Amedî Bucak, xebatê testî yê wesayîtanê îtfaîya yê bi techîzatê temamî cayê xo de etut kerdî ke newe dekewtî fîloya Serekîya Daîreya ma ya Îtfaîya.

Bucak berpirsîyaran ra derheqê taybetîyanê teknîkan ê wesayîtan de agahî girewtî. Bucak bale ante ser o ke îtfaîyakarîye meslekêk o ke fedakarîyêka girde wazeno.

Bucak bi taybetî seba mudaxeleyanê lezabez û bitesîran ê şewatanê demê hamnanî kedkaranê îtfaîya rê spas kerd û Hewteyê Îtfaîya pîroz kerd.

Program bi fotografê vîrardişî yê kedkaranê ma yê îtfaîya û keyeyanê înan qedîya.