‘Serpêhatîyê Nîkoyê Şilbik’ reseno temaşekerdoxan
Tîyatroyê Şaristanî yê Şaredarîya Amedî ya Şaristanê Girdî kayêko newe ano sahne. Kayê “Serpêhatîyê Nîkoyê Şilbik” de îluzyon û nîşandayîşê balonan pîya yê. Premîyerê kayî 22ê teşrîna peyêne de Merkezê Kultur û Kongre yê Çand Amedî de yo.
Tîyatroyê Şaristanî yê Şaredarîya Amedî ya Şaristanê Girdî (DBŞT) binê banê Serekîya Daîreya Kultur, Huner û Karanê Komelkîyan de xebitîyeno. DBŞT “Serpêhatîyê Nîkoyê Şilbik” resneno temaşekerdoxan. Rejîsora kayî Elvan Koçer a. Mehmet Veysî Yoldaşî kay nuşto û o bi xo kay keno. Premîyer 22ê teşrîna peyêne yewşeme saete 13.00 de Sahneyê Mehmet Emîn Yalçinkayayî yê Merkezê Kultur û Kongre yê Çand Amedî de yo. Kay gedeyan beno rayîrwanîyêka pirrê şayî û surprîzan. Temaşekerdoxî zî beşdarê kayî benê.
Hîkayeyê embazî û parekerdişî
Nîko îluzyonîstêko şîrin o. O wazeno bireso sîrkê girdî yê Welatê Keskesorî û yeno îstasyonê trêne. La o nêreseno trêne. Gede û temaşekerdoxê ke îstasyon de pawenê piştî danê ey. Nîko cesaret gêno û dest bi nîşandayîşê xo keno. Dima o û temaşekerdoxî xo Welatê Balonan de vînenê.
Nîko û gedeyî balonanê rengînan reyde kay kenê û wext xo vîr ra kenê. Nîko reyna nêreseno trêne. La na rey o fehm keno ke tena nîyo. Nîko keşf keno ke nîşandayîşo tewr gird embazîya raştikêne û parekerdiş o.
