Şaredarîya Amedî ya Şaristanê Girdî tesîsê xo yê sosyalî yo dîyin, Tesîsê Sosyalî yê Hamravatî akerd. Tesîso verên, Tesîsê Sosyalî yê Fîskaya yo ke Bajaro Newe de yo. Tesîs Taxa Bagcilarî ya Rezanî de, Parka Wayûbirayîye de 5 aşman de ame temamkerdiş. Sere de cinî, do heme hemwelatîyan rê warêko pêroyî yo biemnîyet û resayox pêşkêş bikero ke heme kesan gêno xo mîyan. Tesîs do rojane 500 kesan rê xizmet bido. Xebatkarê ci pêro cinî yê û tesîs do hetê îştirakê şaredarîye Med Kentsel ve Sosyal Hizmetler San. Tic. A.Ş. ra bêro îdarekerdiş. Merasimê akerdişî de hemşaredarê Şaredarîya Şaristanê Girdî Serra Bucak û Emîn Ay, Parlamentera DEM Partî ya Amedî Adalet Kaya, Hemserekê Şaristanî yê DEM Partî Fatime Uzul Levent û Yunus Muratakan, hemşaredarê qezayan, endamê meclîsê DBB'yî û hetkarê sekreterê pêroyî, temsîlkarê rêxistinanê komelê sîvîlî û zaf hemwelatîyan ca girewt.

Parlamentera DEM Partî ya Amedî Adalet Kaya vat ke krîzê ekonomîk û feqîrîya xorîne problemanê tewr muhîman ê welatî ra yew o û tewr zêde cinîyan ser o tesîr keno: "No tesîs zaf muhîm o, çike tîya de tena cinî do bixebitîyê. Ma pêro zanenê ke dekewtişê cinîyan ê prosesanê berhemdayîşî zaf zehmet o. Coka no tesîs hem seba têkoşînê vera feqîrîya xorîne hem zî seba ke warêko biemnîyet ke keyeyî tede rehet wext bivîyarnê, zaf biqîymet o."

Hemşaredar Bucak vat ke tesîs do xizmetê heme hetanê komelî bikero: "Cinî, ciwanî û keyeyî do bi zerrîrehetîye nê tesîsî ra îstîfade bikerê. Ma modelêk esas gênê ke werdpewjan ra heta yewînanê bînan, tede tena cinî xebitîyenê. Ancî ma wazenê ke berhemê Serekîya Daîreya ma ya Xizmetanê Dewan refanê nê tesîsî de ca bigîrê."

Bucak ard ziwan ke parkan û waranê pêroyîyan de karnasîyê xususî zî est ê û wext bi wext tede fîyatê berz û cîyayî ameyê tatbîqkerdiş: "Ma sey îdareyanê herêmkîyan qerar girewt: Wexto ke peymanê karnasanê parkanê şarê ma qedîyayî, ma do nê tesîsan bi şîrketanê şaredarîya xo bigîrê îdareyê xo. Amancê ma o yo ke komelê xo rê bi şertanê munasîban û ekonomîkan xizmet bidê."

Akerdişî ra dima hemşaredar û êyê ke înan reyde bîyî, tesîsî ra gêrayî û derheqê xebatan de agahî girewtî. Tesîs do goreyê prensîbê "şaredarîya şarî" ke amancê ci qezenc nîyo, çay, qewe, arayî û werdê germ û serdinî binê fîyatê bazarî de, bi fîyatanê resayoxan pêşkêşê hemwelatîyan bikero.

Çarnayox: Mehmet Olmez