Turnuvayê Tenîsî yê 16. Amed Cupî de 354 sporkarî vejîyayî kort
Turnuvayê Tenîsî yê 16. Amed Cupî yê Şaredarîya Amedî ya Şaristanê Girdî, 354 sporkarî kortan de ardî têhet. Sporkarî çar kategorîyan de seba şampîyonîye têkoşîn kenê; musabeqeyî çar tesîsan de dewam kenê. Şampîyonê turnuvayî do bi musabeqeyanê fînalî yê 13ê teşrîna verêne eşkera bibê.
Serekîya Daîreya Xizmetanê Ciwanîye û Sporî, Turnuvayê Tenîsî yê 16. Amed Cupî da destpêkerdiş; turnuva her serre biserûber yeno organîzekerdiş. Amancê turnuvayî no yo ke ciwan û pîlî ver bi sporê tenîsî bêrê, kulturê tenîsî yê şaristanî vila bibo û heskerdoxê tenîsî bêrê têhet. Sporkaran eleqeyêko gird mojna.
354 sporkarî têkoşîn kenê
Turnuvayî de bi pêroyî 354 sporkarê grûbanê emrî yê cîya-cîyayan vejîyayî kort û seba girewtişê dereceyan têkoşîn kenê.
Çar kategorî
Turnuva çar kategorîyan de yeno kerdiş: lajekê ciwanî, cinîyê ciwanî, cinîyê pîlî û lajekê pîlî. Heme kategorîyan de sporkarê ke derece gênê û fînalîstan rê do xelatî bêrê dayîş. Beşdarîya cinîyan zî balkêş bîye: kategorîya cinîyanê ciwanan de 20, kategorîya cinîyanê pîlan de 108 sporkarî têkoşîn kenê.
Musabeqeyî çar tesîsan de yenê kaykerdiş
Musabeqeyî kontrolê hakeman de, Kortê Tenîsî yê Sergirewteyî yê 75 Mehabadî, Kompleksê Sporî yê 500 Evleran, Kortê Tenîsî yê Parka Ersin Tatarî ya Şaredarîya Baglarî û Kortê Tenîsî yê Parkormanî de yenê kaykerdiş. Musabeqeyê fînalî do 13ê teşrîna verêne de bêrê kaykerdiş.
Çarnayox: Mehmet Olmez
