Serekîya Daîreya Polîtîkayanê Cinîyan xebatanê warî dewam kena ke rasterast goş bido taleb û hewceyîyanê cinîyan. Çarçewaya xebatan de ke seba xurtkerdişê piştîpêdayîşê cinîyan û viraştişê çareserîyanê herêmkîyan yenê kerdiş, Taxa Yenîkoy a qezaya Rezanî de cinîyan reyde ame têhetameyîş.

Hemşaredara Şaredarîya Şaristanê Girdî Serra Bucak, Hemverfeka Meclîsê DBB'yî Demet Ceylan, endamê meclîsî û Sereka Daîreya Polîtîkayanê Cinîyan Ozden Gurbuz Sumere pêdîyayîşî de ca girewt ke keyeyêkê taxe de bî.

'Ma zanê ke piştîpêdayîş çiqas rind o'

Sereka Daîreya Polîtîkayanê Cinîyan Ozden Gurbuz Sumer bale ante ser o ke cinî cuya rojaneyî de tena benê û vat: “Ma wazenê tena merkezanê xo de ney, taxanê xo de zî embazanê xo yê cinîyan reyde bêrê têhet, goş bidê probleman û qisey bikerê. Ma zanê ke piştîpêdayîş çiqas rind û weş o.”

Hemşaredare Bucak: Amancê ma o yo ke şaristanî pîya îdare bikerê

Bucake dîyar kerd ke xebatî do tax bi taxe, kuçe bi kuçe dewam bikerê û vat: “Amancê ma o yo ke nê şaristanî pîya îdare bikerê. Bêrê ma pîya qisey bikerê, munaqeşa bikerê û çareserî pîya peyda bikerê. Ewro ma wazenê goş bidê şima. Şîdeto ke vera cinîyan yeno kerdiş, meseleyêka zaf gird û muhîm a. Amancê ma o yo ke cinî xo tena hîs nêkerê û ma probleman rê pîya çareserî peyda bikerê.”

Cinîyan hewceyî û pêşnîyazê xo yê çareserîye pare kerdî

Cinîyan waşt ke cayê karan bêrê kontrolkerdiş, xeta kanalîzasyonî bêra pakkerdiş, tîryakîya madeyan rê çare bivînîyo, rayîran de kerrayê parkeyî bêrê ronayîş, sitargehê heywanan bêrê berdiş cayêko bîn, pakîya dorûverî bêra kerdiş û derman bêro eştiş. Sewbîna waşt ke Merkezê Cuya Cinîyan hîra bibo, merkezê sporî, parka gedeyan û kreş bêrê viraştiş û îmkanê karî bêrê temînkerdiş. Kombîyayîşî de goreyê nê hewceyî û pêşnîyazan rayîrê çareserîya hempare ameyî qiseykerdiş.

Çarnayox: Mehmet Olmez