Şaredarîya Amedî ya Şaristanê Girdî, bi amancê ke piştî bida averşîyayîşê gedeyan, cuya înan a komelkî xurt bikera û cuya keyeyan bikera asan, xebatanê xo dewam kena. Zarokistanê 450 Keyeyan, Keyeyê Miqateyê Rojaneyî yê Zarokistanê Bagcilarî, Odeya Kayî ya Sumerparkî û Odeya Kayî ya Kombanan de demserra xizmetê verdibistane ya 2026-2027î bi hewteyê oryantasyonî dest pêkerd ke binê banê Mudirîya Şûbeyê Xizmetanê Gedeyan a Serekîya Daîreya Xizmetanê Komelkîyan de falîyet ramenê.

Çar merkezan de 508 gedeyî do xizmetî ra îstîfade bikerê

Demserra newîye ya xizmetê verdibistane de Zarokistanê 450 Keyeyan de 138, Zarokistanê Bagcilarî de 150, Odeyanê Kayî yê Sumerparkî de 160 û Odeyanê Kayî yê Kombanan de 60, bi pêroyî 508 gedeyî do xizmetanê verdibistane yê Şaredarîya Şaristanê Girdî ra îstîfade bikerê.

Gedeyan rê waranê cîyayan de qabîlîyetî do bêrê musnayene

Kreş û Keyeyanê Miqateyê Rojaneyî yê Zarokistanî de gedeyanê mabênê 3-6 serrîyan rê, demserra xizmetê verdibistane de qabîlîyetê cîyayî do bêrê musnayene.

Bi amancê piştîdayîşê averşîyayîşê komelkî û şexsî yê gedeyan do atolyeyê drama, muzîk, tîyatro, felsefe, spor û hunerî bêrê organîzekerdene. Weyekerdişê rojane yê gedeyan zî do bi arayî, werdê teştareyî û werdanê mabênî bêro temînkerdene ke hetê dîyetîsyenanê pisporan ra yenê dîyarkerdene.

Xizmetê verdibistane do zafziwanî bêro dayene

Goreyê fehmê xizmetî yê Şaredarîya Şaristanê Girdî ke zafziwanî û zafkulturî esas gêno, falîyetê xizmetê verdibistane yê kreş û keyeyanê miqateyê rojaneyî do mîyanê hewteyî de mabênê saetanê 08.00-16.00 de bêrê ramitene.

'Ma wazenê her gede xo biqîymet û biemnîyet hîs bikero'

Mudira Şûbeyê Xizmetanê Gedeyan a Serekîya Daîreya Xizmetanê Komelkîyan a Şaredarîya Amedî ya Şaristanê Girdî Şevîn Anik erjnayîşê xo yê derheqê demserra xizmetê verdibistane ya 2026-2027î de dîyar kerd ke ê amanc kenê xizmetanê biqalîteyan pêşkêş bikerê ke piştî danê averşîyayîşê gedeyan.

Anik vat: "Ma ewro Kreş û Keyeyanê Miqateyê Rojaneyî yê Zarokistanî û Odeyanê Kayî de demserra xizmetî ya 2026-2027î da destpêkerdiş ke binê banê Mudirîya Şûbeyê Xizmetanê Gedeyan de ke girêdayeya Serekîya Daîreya Xizmetanê Komelkîyan a Şaredarîya Amedî ya Şaristanê Girdî ya, zafziwanî xizmet danê. Ma piştîdayîşê averşîyayîşê gedeyan, xurtkerdişê qabîlîyetanê înan ê komelkîyan û piştîdayîşê keyeyan muhîm vînenê. Amancê ma pêşkêşkerdişê xizmetêko biqalîte yo ke her gede tede xo biqîymet û biemnîyet hîs bikero."