Tîma Hentbolê ya Mêran a Şaredariya Bajarê Mezin a Amedê ku lîga ku tê de têdikoşe bê têkdan qedand û derket Lîga 1emîn, ji bo bilindkirina asta serkeftinê dixebite. Antrenor û sporvanên tîmê diyar kirin ku armanca wan ew e ku di Lîga 1emîn de bi awayekî herî baş têbikoşin û derkevin Lîga Super.

Tîma Hentbolê ya Mêran a Şaredariya Bajarê Mezin a Amedê ku sala borî di bin banê Serokatiya Daîreya Xizmetên Ciwanî û Werzîşê de hat damezrandin, grafîkek serkeftî xêz dike. Tîma Hentbolê ku di Koma G ya Lîga 2emîn a Federasyona Hentbolê ya Tirkiyeyê (THF) de dest bi sezonê kir, kom bê têkdan bi 18 pûanan qedand û bû şampiyon. Tîma ku di Tûra Elimînasyonê ya Play-Offê ya Koma Spî de 3 maçên ku lîstî bi serkeftinê qedand, derket maçên hevrêziya xaçerêz.

Tîmê serkeftina derketina Lîga 1emîn nîşan da

Tîma Hentbolê ya DBB, di hevrêziya xaçerêz de Tîma Hentbolê ya Dibistana Navîn a Herêmî ya Yeşîllî (Mêrdîn) (YBO) bi skora 23-32 têk bir û serkeftina derketina Lîga 1emîn a Hentbolê ya bê têkdan nîşan da.

Tîm ji bo bilindkirina asta serkeftinê dixebite

Tîm ku di nav de sporvanên ku di Dibistanên Werzîşê yên Bêpere yên ku di bin banê Serokatiya Daîreya Xizmetên Ciwanî û Werzîşê de çalakiyan dikin de hatine keşifkirin û tevlî Klûba Sporê ya Şaredariya Bajarê Mezin a Amedê hatine kirin jî hene, ji bo bilindkirina asta serkeftinê bi awayekî zexm xebatên xwe didomîne.

'Pêdiviya Amedê bi vê hebû'

Antrenor û lîstikvanên Tîma Hentbolê ya DBByê der barê serkeftina tîmê û armancên wê de axivîn. Antrenora Teknîkî ya tîmê Berçem Demîrel diyar kir ku ew bi azweriya têkoşînê bi berdewamî derdikevin pêşbirkan û got, "Em ji bo vê gelek xebitîn. Piştgiriya antrenorên me, hevkariya sporvanên me û piştgiriya şaredariya me her tim li ser me bû, me pir xwest, me bawer kir û me têkoşîn kir. Pêdiviya Amedê bi vê hebû."

'Armanca me ew e ku em bi têkoşîneke baş derkevin Lîga Super'

Demîrel diyar kir ku ew dixwazin sporvanên di binesaziyê de mezin bikin û tevlî tîmê bikin û diyar kir ku armanca wan a yekem ew e ku di Lîga 1emîn de bi awayekî herî baş têbikoşin û paşê jî derkevin Lîga Super.

'Em dixwazin bi ser bikevin'

Ji sporvanan Amed Jiyan Kavak diyar kir ku ew di seranserê sezonê de di tempoyeke zexm de xebitîne û got, "Amedê bi hesretî li benda derketina lîgek jorîn bû. Pêşbirk bi awayekî pir têkoşer derbas dibûn. Azwerî, daxwaz, hêrs û hevrêziya di nav maçê de bi awayekî bêkêmasî bû. Ev jî bû gavek ku em derxistin Lîga 1emîn. Armanca me ew e ku em pêşî di Lîga 1emîn de bibin mayînde, paşê jî ji bo Lîga Super bilîzin. Em dixwazin vê ne bi transferên ji derve, lê bi zarokên vê herêmê û vî bajarî ji bo pêvajoyên pêşerojê bi ser bixin. Em ji hevserokên xwe Serra Bucak û Dogan Hatun re ji bo piştgiriya wan spas dikin."

Di dibistana werzîşê ya bêpere de hat keşifkirin

Engîn Aykanat ku di Dibistanên Werzîşê yên Bêpere de hat keşifkirin û tevlî Klûba Sporê ya Şaredariya Bajarê Mezin a Amedê hat kirin jî wiha axivî: "Dema ku ez li dibistanê bûm pêşbirk çêdibûn. Di pêşbirkên ku ez tevlî bûm de mamosteyê me em wekî jêhatî neqandin û em ber bi Klûba Şaredariya Bajarê Mezin ve birin. Ji bo ku ez tevlî tîmê bibim, min di binesaziyan de têkoşîn kir. Di dawiyê de me mafê xwe wergirt û lîsansa xwe derxist. Ji ber ku ez lîsansdar bûm, min jî mafê lîstikê di tîmê de wergirt. Me maçên xwe bê têkdan wekî lîder qedand."

Sira serkeftinê lîstika tîmê ye

Aykanat destnîşan kir ku sira serkeftina wan têkoşîna lîstika tîmê ye û got, "Em bi serhişkî, bi hêrs, bi têkoşînê derketin maçan û me hemû jî bi ser xistin. Her kesê têkoşîn kir, em bi ruhê tîmê derketin Lîga 1emîn. Em bi awayekî zexm ji bo lîga nû amadekariyan dikin."