Hevşaredarê Bajarê Mezin ê Amedê Dogan Hatun, rûniştina yekem a civîna meclisê bi bibîranîna Cîgirê Serokê Meclisê û Parlamenterê DEM Partiyê yê Stenbolê Sirri Sureyya Onder vekir û diyar kir ku ji bo pêkanîna aştiyeke bi rûmet berpirsiyariyeke mezin dikeve ser milê her kesî.

Meclisa Şaredariya Bajarê Mezin, civîna xwe ya meha gulanê ya asayî di bin serokatiya Hevşaredarê Bajarê Mezin Dogan Hatun de li Salona Meclisê pêk anî. Civîn bi rêzgirtina ji bo bîranîna Cîgirê Serokê Meclisê û Parlamenterê DEM Partiyê yê Stenbolê Sirri Sureyya Onder ku di 3'ê gulanê de li nexweşxaneya ku lê dihat dermankirin jiyana xwe ji dest da, dest pê kir.

Hevşaredar Hatun: Bîranîna Onder dê ronahiyê bide têkoşîna me

Hevşaredar Hatun di civîna meclisê de axivî û diyar kir ku di pêvajoyên girîng re derbas dibin û têkoşîna aştiyê ya gelên kurd û tirk ji aliyê erênî ve gihîştiye cihekî baş û Sirri Sureyya Onder yek ji mîmarên vê pêvajoyê bû. Hatun destnîşan kir ku bîranîna Onder dê ronahiyê bide têkoşîna ku tê meşandin û got: “Îro, li ser danîna çekan biryareke ku dê pêşeroja me diyar bike hat dayîn; xwesteka min ew bû ku wekîlê me Sirri jî şahidê îro bûya. Yek ji wan kesên ku herî zêde heq dikir ew bû. Em difikirin ku di mehên pêş de, em ê navê hevalê xwe yê ku jiyana xwe ji bo aştiyê terxan kir, li cihekî sembolîk ê vî bajarî bidin ku heta hetayê bê bibîranîn. Em ê di vî warî de xebatekê bimeşînin.”

‘Roja Dayikên Dayikan pîroz be’

Hevşaredar Hatun axaftina xwe bi pîrozbahîya Roja Dayikan domand û got: “Roja Dayikên Aştiyê, Roja Dayikên Şemiyê, Roja Dayikên ku zarokên wan li cem wan nînin pîroz be. Em hêvî dikin ku ji niha û pê ve tu dayik zarokên xwe winda nekin. Ez hêvî dikim ku em ber bi civakeke ku tê de aştiyeke bi rûmet hebe û her kes bi hev re bi azadî bijî ava bikin. Berpirsiyariyeke mezin dikeve ser milê her kesî, ji niha ve em spasiya kedên her kesî dikin.”