Encûmena Şaredariya Bajarê Mezin a Amedê (DBŞB), ji bo zêdekirina ewlehî û kontrola di xizmetên veguhestina giştî de, biryara 'Karta Şofêr' erê kir.

Encûmena Şaredariya Bajarê Mezin, rûniştina xwe ya duyemîn a civîna asayî ya Hezîranê li dar xist. Di civîna ku di Salona Encûmenê de di bin serokatiya Cîgira Serok Evîn Yelboga de hat lidarxistin, li ser pêkanîna ‘Karta Şofêr’ hate nîqaşkirin. Ev pêkanîn li gorî Xala 14an a Rêziknameya Wesayîtên Veguhastina Giştî ya Taybet a Şaredariya Bajarê Mezin a Serokatiya Daîreya Gihandinê ye û armanc ew e ku kar û barên ajokarên plakaya bazirganî bi rêkûpêk bên qeydkirin.

Biryar bi yekdengî hat girtin

Ji bo wesayîtên bazirganî yên bi plakaya TT, S, M û HO yên ku di nav sînorên Şaredariya Bajarê Mezin de kar dikin, ji bo zêdekirina ewlehî û kontrola di xizmetên veguhestina giştî de, ev pêkanîn hat destpêkirin û bi yekdengî hat qebûlkirin.

Bi biryara hatî girtin, ji bo hemû ajokarên wesayîtên bazirganî yên bi plakaya TT, S, M û HO standina vê kartê mecbûrî hat kirin. Ajokarên xwedî ehliyeta pola D û jor, ger bixwazin, dikarin bi tenê yek “Karta Şofêr” ku hemû komên plakayan dihewîne, bixebitin.

Bi vê pêkanînê, ku armanca wê sîstemeke veguhestinê ya ewletir, kontrolkirîtir û çavdêrîkirîtir e di xizmetên veguhestina giştî de, kesên xwedî karta şofêr dê ji aliyê polêsên trafîkê û zabitayên trafîkê ve bi rêkûpêk bên kontrolkirin.

Perwerde û rapora tenduristiyê dê mecbûrî bin

Piştî pêvajoya belavkirina kartan, di nûvekirinên ku dê bên kirin de, şertên temamkirina perwerdeya ku ji aliyê Şaredariya Bajarê Mezin ve bê dayîn û pêşkêşkirina rapora tenduristiyê ya ku nîşan dide madeya hişbir bikar neaniye, dê bên xwestin.

Di çarçoveya Rêziknameya Plakaya Bazirganî de, ger rewşên qedexekirî yên têkildarî ajokaran bêne tespîtkirin, karta kesê têkildar dê bê betalkirin û rewşa sûc û îxlalkirinê bê nirxandin, ew ê ji bo demekê ji veguhestina giştî bê qedexekirin.