Hunermenda operayê ya cîhanî Pervîn Çakar, bi armanca vedîtina talentên ciwan, li Navenda Çand û Kongreyê ya Çand Amedê ji bo komeke 14 kesî xebateke masterclassê ya şanoya operayê ya du rojan li dar dixe.

Bi piştgiriya Serokatiya Daîreya Çand û Karên Civakî ya Şaredariya Bajarê Mezin a Amedê, di bin rêveberiya Hunermend Pervîn Çakar de xebata masterclassê ya şanoya operayê dest pê kir. Koma 14 kesî, ku di nav wan de xwendekarên beşa operayê ya konservatuara dewletê û kesên ku perwerdehiya muzîka gelêrî ya Kurdî girtine hene, dê piştî xebatê konserê bidin.

Hunermend Pervîn Çakar diyar kir ku Hevşaredarên Şaredariya Bajarê Mezin a Amedê û Seroka Daîreya Çand û Karên Civakî Zeynep Yaş bi heyecan ev proje qebûl kirine û spasiya wan kir. Çakar diyar kir ku di nav komê de xwendekarên beşa operayê ya konservatuara dewletê û yên ku perwerdehiya muzîka gelêrî ya Kurdî girtine hene û got: "Min xwest ku her du jî bi hev re bin. Ji ber ku tişta ku ez dikim jî ev e. Ji ber ku min hem muzîka Kurdî hem jî muzîka operayê tevlihev kiriye, min xwest hunermendan bibînim ku karibin her duyan jî bi hev re bibêjin. Gelek ji wan dixwazin xwe ne di warê operayê de, lê di warê muzîka gelêrî de pêş bixin. Ew mijareke cuda ye."

Pirek di navbera Rojhilat û Rojava de

Çakar bal kişand ser girîngiya atolyeyê ya ku armanc dike di navbera rojhilat û rojava de pirekê ava bike û wiha got: "Armanca min a sereke ew e ku derdoreke wisa biafirînim ku ew karibin bingeha hînkirinên rojava bi awayê otantîk ê muzîka Kurdî re tevlihev bikin. Îro jî di xebatê de wan ew dît. Dema ku temrînên deng dikirin, dema ku diafragmê bi kar dianîn, di operayê de çawa tê bikaranîn, dema ku berhemên gelêrî yên muzîka Kurdî digotin çawa tê bikaranîn? Bi kêmanî wan ev dît. Cûdahî di navbera wan de jiyan. Ev ji bo min girîng bû."

'Zehf giring e ku li Amedê hatiye kirin'

Çakar diyar kir ku pêkanîna projeyê ji aliyê şaredariyê ve ew pir kêfxweş kiriye û got: "Pêkanîna tiştekî wisa bi taybetî li Amedê ji bo min girîng bû. Tevî ku ez ji Mêrdînê me jî, pişkiftina min a destpêkê li vir e. Min li vir di Lîseya Hunerên Ciwan de xwend. Bi taybetî vedîtina operayê li vî bajarî bû. Ji ber vê yekê, ji bo min girîng e ku ez dîsa werim vî bajarî û me talentên ciwan vedîtin. Ez armanc dikim ku beşdarî perwerdehiya wan bibim û wan pêş bixim."

Çakar diyar kir ku xebata atolyeyê dê bi konsera ku ciwan di roja duyemîn (11'ê Îlonê) de bidin, bi dawî bibe û got: "Ez ê wekî perwerdekar li gel wan bim, min bêtir xwest ku ew xwe nîşan bidin. Konsera ku ew ê bidin dê bibe çavkaniya motîvasyona wan."