Hevseroka Şaredariya Bajarê Mezin Serra Bucak ku di civîna şêwirmendiyê ya DTSO'yê de axivî, diyar kir ku Amed ji turîzmê heta sektora xizmetguzariyê, xwedî potansiyeleke mezin e û got ku tecrûbeya rêveberiya herêmî ya li Amedê bê bipêşxistin, dê ji bo asta herêmî bibe mînak.
Hevseroka Şaredariya Bajarê Mezin a Amedê Serra Bucak, beşdarî civîna şêwirmendiyê ya Odeya Bazirganî û Pîşesaziyê ya Amedê (DTSO) bû, ku pirsgirêkên Amedê, dînamîzma aborî ya bajêr û qebareya bazirganî hatin nirxandin. Ji bilî Hevserok Bucak, Serokê DTSO'yê Mehmet Kaya, endamên desteya rêveber a DTSO'yê, serokên komîteyên pîşeyî, nûnerên cîhana karsaziyê û saziyên bajêr, Hevberdevkê Meclisa Şaredariya Bajarê Mezin Demet Ceylan, endamên Meclisê yên DÎSKÎ'yê Evîn Yelboga û Hamza Onen, Sekreterê Giştî yê Şaredariya Bajarê Mezin Emrullah Gorduk, Alîkarê Sekreterê Giştî Serdar Bakiroglu, Seroka Daîreya Xizmetên Jin û Malbatê Ozden Gurbuz Sumer, Seroka Daîreya Xizmetên Darayî Ozlem Tekîn, Serokê Daîreya Lênihêrîna Rê û Koordînasyona Binesaziyê Burhan Kaya, Serokê Daîreya Gihandinê Temel Cengîz, Serokê Daîreya Sîstema Rêhesinî Erdal Balsak, Mahmut Bora ji MED A.Ş, Cîgirê Serokê Desteya Rêveber a Med A.Ş Mervan Yildiz, nûnerên rêxistinên pîşeyî û karsaz beşdar bûn.
'Em parastina wê dikin ku bajar ji aliyê rêveberiya herêmî û alîgirên wê ve were birêvebirin'
Mehmet Kaya Serokê DTSO'yê ku axaftina vekirinê ya civînê kir, diyar kir ku weke DTSO, ew parastina wê dikin ku bajar ji aliyê rêveberiya herêmî û alîgirên wê ve were birêvebirin û got, "Me dît ku dema ku çavkaniyên ji navendê tên, heke yên temam jî bin, bêyî ku raya rêveberiya herêmî û alîgirên wê were girtin, hem dibin sedema zêdebûna çavkaniyan û hem jî nagihêjin wan pêkhateyên ku divê bigihêjin."
'Ji bo zêdekirina kalîteya jiyanê pir girîng dibînin'
Kaya anî ziman ku bi Şaredariya Bajarê Mezin re li ser gelek mijarên cuda hatine cem hev û got, “Em ji perwerdeyê heta gastronomiyê, ji çandiniyê heta pêşketina gundewarî, bi hevdîtinên domdar re hevkariyê dikin. Armanca sereke ya civîna îro ragihandina pirsgirêkên mîkro yên ku di komîteya pîşeyî de xuya dibin û ji bo çareserkirina wan çareseriyên înteraktîf peyda bikin. Xebatên ku bi rêveberiya herêmî û alîgirên wê re werin kirin, ji bo baştirkirina rewşa sosyo-aborî û kalîteya jiyanê ya bajarekî pir girîng in.”
Hevserok Bucak: Em ji bo axaftina li ser rêyên çareseriyê li vir in
Serra Bucak a Hevseroka Şaredariya Bajarê Mezin jî diyar kir ku piraniya rêveberiya Şaredariya Bajarê Mezin di civînê de cih girtine û got, “Hemû nûnerên me yên ji binesaziya bajêr heta pirsgirêkên jîngehê li vir in. Ji bo vê vexwendina bi qîmet gelek spas. Em hema hema 18 mehan temam dikin. Ji roja ku em hatin hilbijartin, em di mijarên cuda de hatin cem hev. Em vê yekîtiyê û danûstendina fikran pir giring dibînin. Îro em ji bo axaftina li ser rêyên çareseriyê li vir in."
'Astengî li pêşiya derketina potansiyela bajêr hene'
Bucak anî ziman ku Amed ne tenê bajarekî dewlemend ê dîrokî û çandî ye, di heman demê de ji turîzmê heta sektora xizmetguzariyê xwedî potansiyeleke mezin e û wiha axivî: "Ruhê karsaziyê yê di her mijarê de, potansiyela bajêr dike navenda bazirganiya herêmî, lê astengî li pêşiya vê potansiyelê hene. Rewşa torên me yên lojîstîk û sînordariya kapasîteya hilberînê vê potansiyelê zehmet dikin. Ji ber hawîrdora pevçûnê heta niha ji aliyê ewlehiyê ve weke ‘bajarê rîskê’ tê dîtin, eleqeya veberhênerên Amedî û veberhênerên nêzî herêmê li vir kêm dike. Ev birîna me hemûyan e. Lê belê mijar ber bi cihekî din ve diçe; em dixwazin memnûniyeta xwe ya ji vê yekê îfade bikin.”
'Çareseriya hevpar a ji bo pirsgirêkên bajêr, dibe wesîle ji bo çareserkirina pirsgirêkan'
Hevserok Bucak diyar kir ku di çarçoveya gavên ji bo çareserkirina pirsgirêka kurd de avakirina komîsyona di bin banê Meclisa Tirkiyeyê de û vekirina xetek nû girîng e û got, “Her ku meseleya aştiyê pêş dikeve, wê gelek potansiyelên bajêr derkevin holê. Piştgiriya rêveberiyên herêmî yek ji mijarên herî krîtîk e. Weke Amed, em çawa xizmetguzariyên ji aliyê herêmê ve dixwazin, tevkariya herêmî ya vê yekê ji bo hemû mekanîzmayên bajêr çi ye? Em tenê di bajarê xwe de na, di asta herêmî de jî parastina wê dikin. Gelek pirsgirêk hene, wek neketina ciwanan a kar û pirsgirêkên binesaziyê. Pêvajoyek ku tê de saziyên navendî yên ku kanalên diyalogê vekirî ne, dikarin ji bo pirsgirêkên bajêr çareseriyên hevpar bibînin, dibe wesîleya çareseriya saxlem a pirsgirêkan.”
'Destwerdanên ji derve dibin sedema xirabûna demdirêj'
Hevserok Bucak diyar kir ku destwerdanên ji derve yên li bajêr dibin sedema xirabûna demdirêj û wiha got: “Piştî erdhejên 6'ê Sibatê, devera lojmanan a Ogdax hat ragihandin û sed hezar kes çûn wir; Ev pirsgirêkên bajarî yên ku em pê re rû bi rû ne, bi zelalî nîşan dide. Nêzîkatiyên ku bêyî hevahengkirina biryaran bi aqilê herêmî û hemû dînamîkên wê tevdigerin, dibin sedema pirsgirêkên gihandin û lojîstîkê. Destwerdanên ji derve yên bi destê qeyûman, me mecbûr dike ku em bi pirsgirêkên rabirdûyê re mijûl bibin, bêyî ku beşdarî û hewcedariyên bajêr bên ber çavan. Em hemû van tiştan bi nêzîkatiyeke sebir û tehamul, bi berçavgirtina aliyên erênî û neyênî ve dinirxînin. Di vê demê de, ez dixwazim dîsa tekez bikim ku divê herêm xwedî gotin be."
Tekezî li ser pêşketina navxweyî
Hevserok Bucak diyar kir ku weke Şaredariya Bajarê Mezin, wan ‘pêşketina navxweyî’ ango yek ji teoriyên pêşketinê, xistine rojevê û parastina wê kirine ku dewlemendiya çandiniyê ya bajêr derkeve pêş û wiha got: “Divê yekbûna çandinî-pîşesaziyê were pêkanîn. Ji ber guherîna avhewayê, em di qebareya berhemên çandiniyê de kêmbûneke mezin dibînin. Em dixwazin ku DTSO van pirsgirêkan beriya niha bibîne û pêşniyarên çareseriyê pêş bixe.”
Pêşkêşkirina projeyan hat kirin
Di berdewamiya civînê de komên komîteya pîşeyî, li ser gelek qadan ji gihandinê heta binesaziyê, ji rêkûpêkkirina jîngehê heta hewcedariyên malên pîşesaziyê, ji piştgiriyên çandiniyê heta cûdakariya erênî ya ji bo jin û karsazên ciwan, pirsgirêkên giştî, warên xebatên hevpar û daxwazên xwe weke rapor pêşkêş kirin. Di civînê de ku rewşa heyî ya aboriya bajêr û ramanên ji bo pêşxistina qebareya bazirganî hatin parvekirin, Serokê Daîreya Sîstema Rêhesin Erdal Balsak jî, derbarê hûrgiliyên projeya tramvayê ya ku tê plankirin li bajêr bê çêkirin û qonaxa ku hatiye pêşkêş kir. Hevseroka Şaredariya Bajarê Mezin Bucak jî projeyên Şaredariya Bajarê Mezin ên li ser ekolojiya domdar, turîzm, hevkariyên navneteweyî û binesaziyê parve kirin û her wiha hûrgiliyên projeyên ku binesaziya Şaredariya Bajarê Mezin xurt dikin vegotin.
Sekreterê Giştî yê Şaredariya Bajarê Mezin Emrullah Gorduk jî bersiva pêşniyar û daxwazên hatin dayîn û helwest û amadekariyên Şaredariya Bajarê Mezin kurt kirin.
Piştre jî esnafên piçûk û navîn û nûnerên odeyên din, daxwaz û pêşniyarên xwe anîn ziman.
