Rêveberiya Giştî ya DÎSKÎ ya Şaredariya Bajarê Mezin a Amedê, merasîma danîna kevirê bingehîn ê Projeya Qonaxa 2yemîn a Tesîsa Paqijkirina Ava Vexwarinê ya Navendî ya Talaytepeyê pêk anî, ku armanc dike hilberîna ava bajêr du qat zêde bike û heta sala 2050'an kêşeya avê çênebe. Hevşaredar Serra Bucak di merasîmê de axivî û diyar kir ku wan ne tenê kevirê bingehîn ê înşaatekê danîn, lê wan edaleta avê, ku çavkaniya jiyanê ye, ava kirin.

Rêveberiya Giştî ya DÎSKÎ ya Şaredariya Bajarê Mezin a Amedê, bi piştgiriya Îlbankê û Ajansa Hevkariya Navneteweyî ya Japonê (JICA), merasîma avêtina kevirê bingehîn a Projeya Qonaxa 2yemîn a Tesîsa Paqijkirina Ava Vexwarinê ya Navendî, ku li Kayapinar Talaytepeyê dest bi avakirina wê hatiye kirin û destpêka serdemeke nû di xizmetên ava vexwarinê ya bajêr de nîşan dide, pêk anî.

'Em rûpeleke nû di rêveberiya avê de vedikin'

Midûrê Giştî yê DÎSKÎ Mehmet Şerîfoglû, di merasîma vekirinê de axivî û diyar kir ku wan li Amedê rûpeleke nû di rêveberiya avê de vekiriye û got: "Me her tim hewl da ku em bigihîjin giştîyekê. Ev yek ji parçeyên herî girîng ên vê giştîyê ye. Wek berdewamiyeke vê parçeyê, em dixwazin mizgîniya xeta sereke ya veguhastinê ya ku hûn li ser rê dibînin jî bidin. Du sal in xebateke bi lez heye. Em her carê parçeyekê temam dikin."

'Ji bo 50 salên pêş kêşeya avê çênebe, çi ji destê me tê em ê bikin'

Şerîfoglû anî ziman ku ew ê ava vexwarinê bigihînin standardên Rêxistina Tenduristiyê ya Cîhanê (DSO) û got: "Em dixwazin spasiya Bankeya Parêzgehan (Îller Bankası) û hemû piştgirên vê xebatê bikin. Em ê ji bo vê veberhênanê ti xerc nedin, wekî hîbe (beşeke alîkariyê) tê, ji ber vê yekê em gelek kêfxweş in. Di heman demê de, em di hundirê vê qadê de perçeyek ji rêveberiya ava zîrek jî ava dikin; em ê diyar bikin ka em avê digihînin ku derê û çawa. Em çi ji destê me tê dikin ku Amed 50 salan kêşeya avê nejî. Sala bê em ê hemû veberhênanên xwe li deverên gundewarî û navçeyan bikin."

Hevşaredar Bucak: Em edaleta avê ava dikin

Hevşaredara Şaredariya Bajarê Mezin Serra Bucak jî anî ziman ku nirxê projeya navborî di wê de ye ku di çarçoveya piştgiriya hîbeyê ya JÎCA'yê de ye û çavkaniyên navxweyî nehatine xerckirin. Hevşaredar Bucak anî ziman ku li Erxenî û Farqînê jî projeyên hîbeyê hene û hêvî kir ku ev jî di demeke nêz de bên bicihanîn û got: "Îro li vir ne tenê kevirê bingehîn ê înşaatekê hate avêtin, lê me edaleta avê, ku çavkaniya jiyanê ye, ava kir."

'Kevirê bingehîn ê hevgirtineke navneteweyî jî tê avêtin'

Hevşaredar Bucak got, "Di têgihîştina me ya şaredariyê de, nebûna bêavî ji tu hemwelatî û zindîyan re, şerta yekem a edaleta civakî û jiyana wekhev e," û destnîşan kir ku Projeya Qonaxa 2yemîn a Tesîsa Paqijkirina Ava Vexwarinê ya Navendî ku ji aliyê DÎSKÎ ve tê meşandin, yek ji mînakên herî xurt ên vê têgihîştinê ye. Hevşaredar Bucak diyar kir ku bi saya projeyê ya ku bi lêçûna veberhênanê ya 919 milyon û 421 hezar lîre tê bicihanîn, bi kapasîteya paqijkirina ava vexwarinê ya 3,2 metrekup di saniyeyê de, ewlehiya avê ya demdirêj a bajêr dê were misogerkirin û wiha got: "Dema ku di dawiya 450 roj xebatê de biqede, binesaziya ava vexwarinê ya Amedê dê bihêztir bibe, û kalîteya avê dê bigihîje standardên navneteweyî. Ev proje, bi riya Îlbankê, bi piştgiriya Ajansa Hevkariya Navneteweyî ya Japonê (JICA) tê fînansekirin. Ango îro li vir ne tenê kevirê bingehîn ê veberhênanekê, di heman demê de kevirê bingehîn ê hevgirtineke navneteweyî jî tê avêtin."

'Av di heman demê de mafekî jiyanê ye'

Hevşaredar Bûcak destnîşan kir ku av ne tenê hebûnek e, di heman demê de mafekî jiyanê ye û wiha domand: "Em ji bo parastina vî mafî û misogerkirina gihandina wekhev a avê ji her kesî re dixebitin. Armanca me di her xizmeta ku DÎSKÎ dimeşîne de, bi awayekî adil, bikêrhatî û ewle rêvebirina avê ye. Dema ev proje biqede, ji bo pêşeroja Amedê binesaziyeke avê ya bihêztir, paqijtir û domdartir wê were damezrandin. Ev, ne tenê gaveke ji bo îro ye; gavek e ku mafê jiyanê yê nifşên pêşerojê jî bixe bin ewlehiyê. Pêşketin, ne tenê bi betonê; bi rêzgirtina ji xwezayê, mirov û pêşerojê re mimkun e. Ji bo me şaredarî, ne tenê xizmeta binesaziyê, lê belê pratîkeke wijdanî ye ku jiyana gel hêsan dike. Li van axan, dengê avê di tevahiya dîrokê de qet nesekinî. Dengê Dîcleyê qet nesekinî, berdewam kir ku bibe bîra û nefesa bajêr. Em ê bi têgihîştina parastina jîngehê vê bîrê bidomînin. Em dixwazin ji dil spasiya her kesê ku di vê projeyê de ked daye, bikin. Em ê bi hev re Amedê mezin bikin û ji bo Amedê hilberînê bidomînin."

Piştî axaftinan, Hevşaredar û kesên pê re bûn, bi tikandina bişkojê dest bi xebatê kirin.

Projeya qonaxa 2yemîn a Tesîsa Paqijkirina Ava Vexwarinê ya Navendî dê çi bîne bajêr?

Tesîsa ku li Talaytepeyê dest bi avakirina wê hatiye kirin, bi kapasîteya hilberîna avê ya rojane 260 hezar metrekup, dê bi awayekî girîng pêdiviya ava vexwarinê ya bajêr dabîn bike. Projeya ku bi hevkariya Îlbank û JICA ve tê meşandin, bi giştî xwedî mezinahiyeke veberhênanê ya nêzîkî 1 milyar TL ye.

Bi vê veberhênanê re, kapasîteya ava vexwarinê ya li Amedê dê du qat zêde bibe; bi saya hewz û sîstemên paqijkirina pêşketî yên di nava tesîsê de, av dê bigihîje kalîteya vexwarinê ya di standardên navneteweyî de.

Dê di 450 rojan de biqede

Projeya Qonaxa 2yemîn a Tesîsa Paqijkirina Ava Vexwarinê ya Navendî ku tê plankirin 450 roj şûnda biqede, dema ku temam bibe dê di nav 10 tesîsên herî mezin ên paqijkirina ava vexwarinê ya Tirkiyeyê de cih bigire. Bi saya tesîsê, armanc ew e ku heta sala 2050'an li bajêr kêşeya avê çênebe.