Şaredariya Bajarê Mezin a Amedê, bi hevkariya Sendîkaya Xebatkarên Xizmetên Tenduristî û Civakî (SES) û Komeleya Penceşêrê ya Ronahiya Rojê, ji bo zêdekirina hişyariyê li ser penceşêrê, panelek bi navê "Hişyariya Penceşêrê û Pêşketinên Nû di Tedawiyê de" li dar xist.
Midûriyeta Daîreya Karên Tenduristiyê, bi hevkariya SES û Komeleya Penceşêrê ya Ronahiya Rojê, li Navenda Çand û Kongreyê ya Çand Amedê, bi armanca zêdekirina hişyariya li ser penceşêrê li gorî pêşketinên zanistî yên di têkoşîna li dijî penceşêrê de û nirxandina nêzîkatiyên nû yên tedawiyê, ev panel organîze kir. Di panelê de Serokê Daîreya Karên Tenduristiyê Vahap Saçakli, xebatkarên tenduristiyê û gelek welatî amade bûn.
Moderatoriya panelê, ku Profesor Doktor Gokhan Demir û Doktorê Pispor Halis Yerlikaya wek axaftvan beşdar bûn, ji aliyê Hevseroka Şaxa Amedê ya SES'ê, Yildiz Ok Orak ve hat kirin.
'Di têkoşîna li dijî penceşêrê de teşhîsa zû girîng e'
Doktorê Pispor Halis Yerlikaya, ku panela bi pêşkêşiya Yildiz Ok Orak dest pê kir de axivî, bal kişand ser girîngiya teşhîsa zû di têkoşîna li dijî penceşêrê de. Yerlikaya di axaftina xwe de bal kişand ser penceşêra singê jî û anî ziman ku ji bo teşhîsa zû girîng e ku jin piştî 40 saliya xwe serî li navendên tenduristiyê bidin ji bo kişandina mamografiyê. Yerlikaya herwiha diyar kir ku di nava civakê de têgihîştineke wiha heye ku penceşêr bi hewayê derbas dibe û tiştên şaş dihatin zanîn vegot.
'Kontrolên penceşêrê divê heta faktora metirsiyê tunebe jî bêne kirin'
Profesor Doktor Gokhan Demîr jî got ku divê kontrolên penceşêrê heta faktora metirsiyê tunebe jî bêne kirin. Demîr anî ziman ku di laş de ji sedî zêdetir tumor derdikevin, lê kontrol tenê ji bo 4-5 cureyên penceşêrê dikarin bêne kirin û wiha berdewam kir:
"Ji bo jinan, divê mamografî bi rêkûpêk piştî 40 saliyê, muayeneya jinekolojîk jî piştî destpêkirina jiyana seksî ya çalak, bê kirin. Ji bo mêr û jinan jî di temenê 45 heta 50 saliyê de girîng e ku kontrolên kolonoskopîk bêne kirin. Em bi rastî jî zêde li ber rojê dimînin. Ji ber vê yekê divê kontrola dermatolojîk bê kirin. Ji bo kesên cixare dikişînin, divê bi tomografiya pişikê bê kirin û ji bo mêran jî (Prostat Spesifik Antijen) PSA salane ji 45-50 saliyê ve kontrol bê kirin. Ji ber ku di temenên herî îdeal de jî mirov dikare bibe penceşêr."
