Rêveberiya Giştî ya DÎSKÎ’yê ya Şaredariya Bajarê Mezin a Amedê li gundewarên bajarî dest bi veberhênaneke berfireh a binesaziyê kir. Ev proje xebatên sondaj, ENH (hêla veguhestina enerjiyê), pompa, depoyên ava vexwarinê û çêkirina şebekeyan li xwe digire.
Rêveberiya Giştî ya Av û Kanalîzasyona Amedê (DÎSKÎ) bi armanca çareserkirina pirsgirêkên ava vexwarinê li gundewarên Amedê û xurtkirina kapasîteya binesaziyê, projeya xwe ya mezin da destpêkirin. Di çarçoveya projeya "Li Cihên Cuda yên Parêzgeha Amedê Çêkirina Sondaj, ENH, Pompa, Depoyên Ava Vexwarinê, Sazgehên Şebekeyê" de, nêzîkî 900 mîlyon TL veberhênan tê kirin. Ev veberhênan ji hilberandina ava vexwarinê bigire heta gihandin, çêkirina şebekeyê, depokirin û belavkirinê, hemû pêvajoyên binesaziyê li xwe digire.
Binesaziya hilberandin û gihandinê dê bê xurtkirin
Di çarçoveya projeyê de, bi giştî 45 hezar metre bîrên sondajê, 10 bîrên keson, 60 hêlên veguhestina enerjiyê (ENH) yên bi hêzên cuda û 70 pergalên pompayê dê bên avakirin. Bi vê veberhênanê re, armanc ew e ku çavkaniyên avê yên bin erdê tevlî pergalê bibin û kapasîteya dabînkirina ava vexwarinê zêde bibe.
Kapasîteya belavkirinê ya şebeke û depoyan dê bê zêdekirin
Di çarçoveya veberhênanê de, 282 hezar û 200 metre hêla şebekeya ava vexwarinê ya bi pîvazên cuda, 50 depoyên ava vexwarinê û 2 hezar û 500 girêdanên aboneyan dê bêne çêkirin. Bi vê xebatê, armanc ew e ku pirsgirêkên gund û cihên niştecîhbûnê yên li seranserê parêzgehê ku bi kêmasiya ava vexwarinê re rû bi rû ne, bên çareserkirin.
Xebat dê li seranserê bajêr bên kirin
Proje; navçeyên navendî Baglar, Yenişehir, Kayapinar û Surê; gund û gundikên di çarçoveya Herêma 1'emîn de (Bismil, Farqîn, Çinar, Karaz, Pasûr, Lice û Hezro); û gund û gundikên di çarçoveya Herêma 2'yemîn de (Erxenî, Çermûg, Çungûş, Pîran, Gêl û Hênê) li xwe digire. Maweya projeyê, ji roja teslîmkirina cih pê de, 1080 rojên salnameyê hate destnîşankirin.
Mehmet Şerifoglu: ‘Gihîştina wekhev ji bo ava vexwarinê pêşengiya me ya bingehîn e’
Rêveberê Giştî yê DÎSKÎ’yê Mehmet Şerifoglu li ser projeyê nirxandinek kir û anî ziman ku wan ev xebat bi armanca çareserkirina pirsgirêkên gihîştina ava vexwarinê li gundewaran û misogerkirina mafê wekhev a gihîştina ji bo hemû welatiyan, daye destpêkirin. Şerifoğlu got: “Em ji hilberandinê heta depokirinê, ji binesaziya enerjiyê heta hêlên şebekeyê, hemû pergalê bi nêzîkatiyek giştbîn xurt dikin. Armanca me ew e ku em cudahiya standarda xizmetê ya di navbera navenda bajêr û gundewaran de kêm bikin û ava vexwarinê bi awayekî domdar, bêbirîn û dadperwerane dabîn bikin. Ev xebat ne serlêdanek asayî ye; ew gavek berfireh a binesaziyê ye ku ji bo gundên bi pirsgirêka ava vexwarinê re hatî plansazkirin. Ev bernameya nêzîkî 900 mîlyon TL’î ye, gaveke stratejîk e ku wekheviya xizmetê li seranserê Amedê xurt dike.”
