Hevseroka Şaredariya Bajarê Mezin a Amedê Serra Bucak, beşdarî tora Xelatên Aştî, Dostanî û Demokrasiyê bû û diyar kir ku dayîna xelatê bo Sirri Sureyya Onder û parêzvana mafên mirovan Gisela Penteker gelekî bi qîmet e.

Tora Xelatên Aştî, Dostanî û Demokrasiyê ku ji aliyê Odeya Bijîşkan a Amedê ve hatibû organîzekirin, li Navenda Çand û Kongreyê ya Çand Amedê birêve çû. Bername bi panela bi sernavê “Rewşa Başbûna Civakî: Ji Aştiyê Ber bi Tenduristiyê Ve” dest pê kir û piştre merasîma xelatan hat lidarxistin.

Di bernameyê de Hevseroka Şaredariya Bajarê Mezin Serra Bucak, Hevberdevka Meclîsa DBB’ê Demet Ceylan, parlamenter, endamên meclîsê, nûnerên saziyên civakî û gelek welatî amade bûn. Di torê de peyama Hevserokê berê yê Şaredariya Bajarê Mezin Selçuk Mizrakli ku ji girtîgehê şandibû jî hat xwendin.

Hevşaredar Bucak: Dayîna xelatê bo Onder û Penteker pir bi wate ye

Hevşaredar Bucak di merasîmê de axivî û anî ziman ku ev xelat ji bo wê xwedî wateyeke mezin e û wiha got:

“Ez îro bi dîtina vê merasîmê serbilind im. Cara yekem min di sala 2016an de, di dema tayînkirina qeyûman de Gisela Penteker û şandeya wê nas kir. Ji wê rojê heta îro, bi keda wê dostaniya me û şêwazê delegasyonê pêş ket û guherî. Wekî ku hat gotin, Gisela û nifşê wê dibêjin ku êdî divê ev têkoşîn dewrî ciwanan bibe. Divê em hemû piştgiriyê bidin vê guherînê. Ez wek keseke ku bi wan re xebitiye, gelekî bextewar im. Gisela Penteker parêzvaneke mafên mirovan û dosteke dilsoz a kurdan e. Mixabin sê sal in ji ber qedexeya ketina Tirkiyeyê nikare bê vir. Ji ber vê yekê, dayîna vê xelatê ji bo wê û Sirri Sureyya Onder pir bi qîmet e.”

Xelat hatin teslîmkirin

Xelatên îsal ên Aştî, Dostanî û Demokrasiyê dan Parlamenterê Partiya DEM'ê Sirri Sureyya Onder û Dr. Gisela Penteker. Hevşaredar Serra Bucak xelata li ser navê Dr. Gisela Penteker da Dr. Nesrîn Qasimlo; xelata Onder jî dan birayê wî Alî Fuat Onder.