Di perwerdeya ku ji bo xebatkarên jin ên Serokatiya Daîreya Veguhastinê ya Şaredariya Bajarê Mezin a Amedê hat lidarxistin de, têkoşîna li dijî tundiya ser jinan hat nirxandin.

Ji aliyê Yekîneya Perwerdeyê ya Serokatiya Daîreya Polîtîkayên Jinan a Şaredariya Bajarê Mezin a Amedê ve, ji bo xebatkarên jin ên di Serokatiya Daîreya Veguhastinê de dixebitin perwerdeya “Wekheviya Zayendî û Têkoşîna Li Dijî Tundiya Ser Jinan” hat dayîn. Gelek jin beşdarî bernameya perwerdeyê ya ku li Navenda Jiyana Jinan ya Quçayê hat lidarxistin bûn.

Mijarên wekhevî û têkoşîna li dijî tundiyê hatin nîqaşkirin

Di perwerdeya ku ji aliyê perwerdekar Eylem Kaya ve hat dayîn de; têgeha zayenda civakî, têkiliya wekhevî û newekheviyê, newekheviyên xuya û nexuya yên ku di jiyana rojane de rû didin bi hûrgulî hatin nirxandin. Her wiha derbarê cureyên tundiya li ser jinê û mekanîzmayên serlêdanê yên di rewşên wiha de, agahiyên berfireh ji beşdaran re hatin ragihandin.

Di perwerdeyê de hat destnîşankirin ku wekheviya zayendî ne tenê bi qanûnan sînordar e; hat gotin ku ev yek di heman demê de bi têkiliyên ku mirov di jiyana rojane de datînin û bi helwestên wan pêkan e. Bi beşdaran re li ser vê mijarê nirxandin hatin kirin. Di dawiya bernameyê de xebatkarên jin nêrîn û ezmûnên xwe parve kirin û li ser mijarê danûstandina fikran kirin.