Şahiyên Serhivdeyê, bi vejandina hafizeya çandî ya qedîm, kevneşopiya devkî û yekitiya civakî, li Farqînê vejîna biharê bi hevdîtineke bi hêz pêşwazî kir.

Li navçeya Farqînê ya Amedê, Şahiyên Serhivdeyê yên ku sembola hişyarbûna biharê, vejîna xwezayê û zêdebûna bereketê ne, îsal jî bi hilgirtina şopên kevneşopiya qedîm dest pê kirin. Şahiyên ku di sê rojên dawî yên meha Adarê de tên lidarxistin, wekî îfadeyeke zindî ya hafizeya çandî ya ku ji rabirdûyê heta îro hatî veguhastin, li Taxa Emerka pêk hatin.

Şahiya ku ji aliyê Serokatiya Daîreya Parastina Mîrata Çandî û Muzeyan a Şaredariya Bajarê Mezin a Amedê û Şaredariya Farqînê ve bi hevparî hat organîzekirin; Hevserokên Şaredariya Farqînê Sevim Biçici û Kadri Esen, Seroka Daîreya Çand, Huner û Karên Civakî ya DBB’ê Zeynep Yaş, nûnerên saziyên civakî û partiyên siyasî û gelek welatî beşdar bûn. Şahiyên Serhivdeyê ne tenê komek çalakî ne; qadeke hevdîtinê ya ku çanda devkî, bawerî, muzîk û yekitiya civakî tê de dibin yek pêşkêş kir.

Dîwana dengbêjan di navbera rabirdû û îro de pira ava kir

Di roja yekem a şahiyê de dîwana dengbêjan a ku hat avakirin, bi dengê dengbêjên ku hilgirê peyv û hafizeyê ne, rabirdû bi îro ve girêda. Çîrokên qedîm, lorîn û destan, guhdar birin serdemên derveyî demê û bîra kolektîf ji nû ve zindî kirin.

Di heman rojê de pêşbaziyên hespan ên ku hatin lidarxistin, wekî nîşaneke dînamîk a têkiliya bi xwezayê û şêwazê jiyana kevneşopî, coş û tevgerek da şahiyê. Xelata beşdarê ku di pêşbaziyê de bû yekemîn, ji aliyê Seroka Daîreya Çand, Huner û Karên Civakî Zeynep Yaş ve hat dayîn.

Sembolên çandî li ser standan hatin zindîkirin

Standên ku li qada şahiyê hatin vegirtin, ne tenê xwarin û vexwarin pêşkêşî mêvanan kirin; di heman demê de bûn navgîna parvekirina sembolên çandî jî. Di standên ku ji aliyê Şaredariya Bajarê Mezin ve hatin avakirin de tiştên wekî loqum, hine û mûm hatin belavkirin. Ev hûrgiliyên piçûk lê bi bandor, rîtuel û cîhana wateyê ya vê xakê bi bîr xistin.