Wesîleya serrgerê Fetihê Dîyarbekirî ya 1382ine çalakîya “Eshabê Kehf û Roja Hîşyarbîyayişî” ame viraştiş. Çalakîya “Hewteyê Fetihî” seba serrgerê 1382ine ya Fetihkerdişê Dîyarbekirî hetê artêşê Îslamî, Eshabê Kehfo ke qezaya Licê taxa Duru de ca gêno de çalakîya “Roja Hîşyarbîyayişî” ame serrastkerdiş.

Çalakî pê wendîşê Quran-î Qerîmî dest pêkerd û Walîyê Dîyarbekirî Munır Karaloglu aşkera kerd ke yewbînîamayişê hewteyê Fetihê Dîyarbekirî û Hîşyarbîyayişê Eshabê Kehfî emaretêk o.

Karalogluyî kîfş kerd ke fetih, hîşyarbîyayîşê îslam, îman û heqîqatî yo û hetê ali Licê hîşyarbîyayişê hewtyaran sey her serreyanê bînan bêro pîrozkerdiş.

Karalogluyî badê wina vat: “Hewt bawermendê ciwan, semedo ke îtîqata xo verba putperestîye bipawê, şikefteyan ra bext waştê. Tîya de verba zilm, zordestî û fitneyî mucadeleyêk esta. Ganî ma dersan bigîrê. Meseleyê hewtyaran sey a roje bî û şî nêy ganî ma ferasetê înan ewro zî verba zilm, zordestî û fitneyan bikeme wesîleyê hîşyarbîyayişê şarî. Ez bawer kena ganî ma dersan bigîrê. “

Karaloglu da zanayene ke ewilî dormeleyê Eshabê Kehfî de sehnayîşê xo viraşto û badê Şaredarîya Girdî semedê qemasîyan dest pê xebatan kerdo û xebata serrastkerdişê dorûverî û viraştişê cayê awdaj girewtişî, nimajkerdişî û arîsîyayîşî resayo na roja pîroz.

“Wa semedo ke hemwelatê ma tarîxê xo bicuwîyê çalakîyanê ma do dewom bikero”

Karalogluyî: “Tîya endî 12 aşmî xizmetê şarî de yo. Tîya de personelan zî bêro wezîfedarkerdiş û hem her cayê şikefteyan endî pak bimano hem zî mêmanê ma eşkenê heme waştîşê xo sey tesîsan uca de bivîyarnê. Semedo ke hemwelatê ma îtîqatê xo vîr ra nêkenê û bicuwîyê çalakîyanê ma dewom bikerê. Ez reyna wazena ke fetihê bajarî ma û hîşyarbîyayişê ma bimbarek bo” vat.

Parlementerê Dîyarbekirî Mehdı Eker zî qalîkerdişê xo de da zanayene ke Şikeftê Eshabê Kehfî hîşyarbîyayişî û mucadeleyê bawerîye tewhîdî temsîl keno. Ekerî vîr vîst ke 40 serrî yo ke rojanê bajarî ma teror bi û badê wina vat: “Eshabê Kehf verba Împaratorîyê putperest a Romêyî mucadeleyê tewhîdî da, na semedê ma sembolêk o. Nê erdan de nê erjeyan yenê hewênayîş.”

Dekanê Fakulteya Huquqî ya Unîversîteya Dîcle Prof. Dr. Hasan Tanrıverdi qalîkerdişê xo de derheqê “Eshabê Kehf û Licê” de agahî dayê beşdaran.

Badê qalîkerdişan Mifteyê Bajarî Yavuz Selim Karabayir xutbeyê îne da û pîya nimajê îne eda kerdî.

Şaredarîya Girdî nimajê îne ra dima hemwelatîyan rê nan îqram kerd.Walî Karaloglu hemwelatê ke ameybi çalakî ra ame têhet û goşna problem û waştîşanê înan.

Çalakî rê Walîyê Dîyarbekirî Munır Karaloglu, Parlementerê Dîyarbekirı Mehdı Eker û Ebubekır Bal, Midurê Asayîşê Bajarî Şukru Yaman, Fermandarê Cendermeyê Bajarî Tuxgeneral Mustafa Erdem, Rektorê Unîversîteya Dîcle Prof. Dr. Mehmet Karakoç û hemwelatîyan beşdar bîyî.

Xebatanê ke Eshabê Kehf de ame viraştiş

Şaredarîya Bajarê Girdî ya Dîyarbekirî semedo ke hemwelatîyan hîna rehet zîyaret bikerê, şikeftê Eshabê Kehfî de 23ê Adare de xebata raştkerdişî dabi dest pêkerdiş.

Qepsema xebatan di 290 metrekareyin mizgeft virazîya. Rayîrê ke şina şikefte de 50 metre nêrdiwanê kerrayin û 55 metre zî nêrdiwanê darin virazîya. Dormeleyê rayîrî de 107 metre caxlemî ame viraştiş.Sewbînan mabênê şikefte de xebata pakîye virazîya û 17 banqê roniştişî, 6 qutîya çopî û 2 heb kamelya ame viraştiş.