Naturaparka 330 hezar metreçarçik bilind dibe
Di projeya Naturaparkê ya 330 hezar metreçarçik de ku ji aliyê Şaredariya Bajarê Mezin a Amedê ve tê meşandin %55ê xebatan hat temamkirin. Naturapark bi du goletên xwe yên biyolojîk, sêwirana xwe ya bêasteng û gihîştî, nêzîkatiya xwe ya ekolojîk ku riwekên heyî diparêze, rêyên bisiklet û meşê û qadên xwe yên civakî ve, wekî yek ji qadên jiyana keskeşîn ên herî mezin ên bajêr tê avakirin.
Xebatên ku ji aliyê Serokatiya Daîreya Park û Baxçeyan ve tên meşandin, li ser xaçerêya Bulvara Prof. Dr. Necmettin Erbakan û Bulvara Firatê berdewam dikin. Naturapark ku dê bibe parka herî mezin a bajêr, tê armanckirin ku tevkariyên girîng bide kultura jiyana ekolojîk.
Ji %55ê xebatan hat temamkirin
Di Naturaparkê de ku çêkirina wê di meha Kanûnê de dest pê kiribû, %55ê xebatan hat temamkirin. Dema ku çêkirina jêrzemînê ya rêyên meşê û bisikletê yên di projeyê de cih digirin hatin temamkirin, amadekariyên bo zemîna jorîn jî berdewam dikin.
Di qadên lîstik û fitnessê û qadên peyzaja riwekan de xebatên tesviye, aks, aplikasyon û raxistina axê berdewam dikin. Mobîlyayên bajêr, komên lîstikan û xebatên peyzaja riwekan jî dê piştî diyarkirina aks û kotên zemîna jorîn dest pê bikin.
Avakirina avahiyan berdewam dike
Di Naturaparkê de çêkirina çar tuwalet û mizgeftekê berdewam dike. Dema ku kergên jêrîn ên avahiyan hatin temamkirin, xebatên înşeata hişk ên bo beşên jorîn tên domandin.
Di goletên biyolojîk de xebatên drenajê
Di du goletên biyolojîk ên di projeyê de xebat berdewam dikin. Dema ku betonên perdeyî yên goletên biyolojîk hatin temamkirin, xebatên drenajê berdewam dikin. Di vê parkê de ku di şûna hewzên klasîk, klorî û yên ku enerjiya zêde dimijin goletên biyolojîk ên lihevhatî bi xwezayê re hatine tercihkirin, hem piştgirîkirina ekosistemê hem jî tesarûfa energiyê tê armanckirin.
Xebatên binesaziyê berdewam dikin
Di çarçoveya xebatên binesaziyê yên li Naturaparkê de, kolana bingehan, xetên drenajê yên ava baranê, binesaziya elektrîkê û karên bo pergala avdanê tên meşandin. Di projeya ku li cihê girîng ê bajar de ye, piştî xebatên binesaziyê dê çêkirina seresaziyan berdewam bike.
Goleta biyolojîk û sêwirana bêasteng derdikeve pêş
Naturapark a ku ji bilî goletên biyolojîk bi sêwirana xwe ya bêasteng derdikeve pêş, ne tenê bo zarokan, bo hemû welatiyan bi fahmeke gihîştî û bêasteng tê sêwirandin. Tê armanckirin ku proje bi vî aliyê xwe ve bibe nimûneyeke girîng a têgihîştina şaredariya civakî.
Tevna riwekan a heyî dê bête parastin
Di Naturaparkê de di şûna paqijkirina temamî ya qadê ku di projeyên mezin de pir tê dîtin, nêzîkatiyeke ekolojîk hat pejirandin. Di çarçoveya projeyê de darên heyî dê werin parastin û bi riwekên nû yên ku dê li qadê werin zêdekirin tevna riwekan wê dewlemendtir bibe.
Rêyên bisiklet û meşê dê werin çêkirin
Li Naturaparkê bi armanca teşwîqkirina jiyana tendurist dê rêyên bisiklet û meşê werin çêkirin. Bi amûrên fitnessê yên ku dê li ser riyên meşê werin bicihkirin, werzişkirina welatiyan dê bête piştgirîkirin.
Di projeyê de her wiha qadên lîstik û fitnessê, qadên rûniştinê, qadên çalakiyên serbest, çar tuwalet, mizgeftek û eksên gerê dê cih bigirin.
