Nêzîkî 3 hezar zarokî navê xwe tomar kirin. Beşdarên ku tevî kursên di navbera demjimêr 08:00 û 17:00'an de (4 rojên heftiyê) dibin, bi wesayîtên servîsê yên şaredariyê ber bi Hewza Nîv-Olimpîk a Seyrantepeyê ya li navçeya Yenîşehîrê ve têne guhestin.

Di perwerdeyên ji aliyê rahênerên pispor ve têne dayîn de bonê û berçavkên melevaniyê jî ji bo zarokan têne peydakirin.

Geşedana zarokan bi gelek aliyan ve tê piştgirîkirin

Bi Dibistanên Werzîşê yên Havînê re armanc ew e ku zarok mehên havînê di hawirdoreke ewle, tendurist û berhemdar de derbas bikin. Bi kursên melevaniyê re tê xwestin ku zarok tirs ku ji avê heye berdin û jêhatîbûnên bingehîn ên melevaniyê bi dest bixin.

Armanc: Gihandina zarokên ku melevaniyê nizanin e

Rahênerê Melevaniyê Serhat Yildirim diyar kir ku nêzîkî 3 hezar xwendekarî navê xwe tomar kiriye û got ku zarok çar heftiyan perwerdeya bingehîn û teknîkî ya melevaniyê dibînin. Yildirim anî ziman ku armanca wan a bingehîn hînkirina melevaniyê ye û bal kişand ser wê yekê ku hin zarok diçin gol, bendav û çemên ku melevanî lê qedexe ye, ku ev jî xetereya xeniqînê zêde dike. Yildirim teqez kir ku hînbûna melevaniyê di bin çavdêriya pisporan de gelekî girîng e.

Yildirim aşkere kir ku armanc ne tenê hînkirina melevaniyê ye, di heman demê de gihandina zarokên jêhatî ye ku di paşerojê de bibin werzîşvanên lîsansdar.

‘Min bi saya mamosteyên xwe tirsa ji avê bezand’

Zal Armanç Karadeniz ê 13 salî ku beşdarî kursê bûye, diyar kir ku berî destpêkirina perwerdeyê ji avê ditirsiya û got:

“Berî ku ez biêm vir, ez ji avê gelekî ditirsiyam. Bi saya mamosteyên li vir min ev tirs bezand. Madem min tirs bezand, êdî ez dikarim li her cihê ku dixwazim melevaniyê bikim.”

Amed Emsen ê ku ew jî beşdarî kursê bûye got:

“Gava ez yekem car hatim vir min melevanî nedizanî. Bi saya perwerdeyê ez fêr bûm. Ji bo zivistanê jî em ji şaredariya xwe hewzeke girtî dixwazin.”

Şaredariya Bajarê Mezin a Amedê wê xebatên xwe bidomîne da ku xizmetê ji bo pêşeroja zarokan û belavkirina çanda werzîşê bike.