Hemşaredarê Şaredarîya Amedî ya Şaristanê Girdî Serra Bucak û Dogan Hatunî, Ben û Sen de seba parke do senî newe ra bêro viraştene, şarê taxe reyde ameyî têhet, fikr û waştişê înan girewtî. Hemşaredaran va ke ê do notê ke derheqê waştişan de girewtê, game bi game bîyarê ca.

Şaredarîya Şaristanê Girdî, seba ameyoxê parka BenûSen ke sînorê Taxa Şehîtlîkî yê Qezaya Yenîşehîrî de ya, têhetameyîşê şarî organîze kerd. Têhetameyîşê şarî de Hemşaredarê Amedî ya Şaristanê Girdî Serra Bucak û Dogan Hatun, Hemşaredarê Yenîşehîrî Safîye Akdag û Mehmet Ergun, Sekreterê Pêroyî Emrullah Gorduk, Hetkarê Sekreterê Pêroyî Zerîn Turk, Reşat Bakan û Azîz Ozdogan, serekê daîreyan, endamê meclîsî û şarê taxe beşdarê kombîyayîşî bîyî. Têhetameyîşî de domanan, cinîyan û şarê taxe yew bi yew qisey kerd û fikre xo yê ‘na parke do senî înan rê faydeyîn bo’ vatî.

Hemşaredare Bucak: Ma wazenê ke ma pîya probleman safî bikê

Hemşaredare Bucak têhetameyîşî de qisey kerd û va ke ê tîya de Keyeyê Cuya Cinîyan de zaf rey yenê têhet û îlawe kerd ke her çiqas problemê înan cîya-cîya bibê zî, ê zanê ke BenûSen seba şarî çiqas muhîm o. Bucak wina dewam kerd: "Ma sey îdareyê Şaredarîya Şaristanê Girdî, serekê daîreyan û endamê meclîsî ameyî ke şima ra goşdarî bikê. Ma sey Şaredarîya Şaristanê Girdî û Şaredarîya Yenîşehîrî wazenê ke ma pîya problemanê taxe safî bikê. Ma wazenê ke ma goşdarîya pêşnîyazanê şima yê derheqê na parke de bikê. Domanî û cinî, seba na parke çi wazenê, waştişê înan çi yê? Ê qada futbolî wazenê yan hewiz wazenê?"

Hemşaredar Hatun: Ma do probleman safî bikê, ma do domanan rê hawiz virazê

Hemşaredar Hatunî zî îfade kerd ke ê badê têhetameyîşan heme parçeyanê şaristanî  ra dima ê taxan ra gêrenê  û wina va: "Eke kotî de problemêk est o, kotî de 8 serrî yo xîzmet çin o, ma wazenê ke ma ê kesanê ke uca de ciwîyenê, înan reyde kombîyayîşan bikê û pîya çareyan bivînê. Domanî vanê ma rê yew hawiz virazê. Ma do înan rê hawiz virazê. Problemê na taxe çi yo, bêrê ma pîya safî bikê. Şima ewro şênê qisey bikê, problemanê xo vajê ke ma pîya safî bikê."