Şaredarîya Amedî ya Şaristanê Girdî, çarçewaya kerdişanê şaredarîya sosyalî de waştiş, pêşnîyaz û gazinê welatîyan nirxnena û çareser kena. Na çarçewa de 4 aşmanê peyênan de waştişê 5 hezar kesanê ke beşê Ca de Çarekerdişî rê muracaat kerdî, ameyî çarekerdene, 170 hezar vengdayîşê ke Alo 153 rê ameyî, cewab ame dayene

Beşê "Ca de Çarekerdiş" û merkezê vengdayîşî yê "Alo 153"î ke binê Serekîya Daîreya Çapemenî, Weşan û Têkilîyanê Şarî de xizmet danê, goreyê waştişanê ke yenê, çareserî peyda kenê.

Beşê Ca de Çarekerdişî, awanîya merkezî ya Şaredarîya Şaristanê Girdî û di ofîsanê cîya-cîyayan ê Termînalê Otobusanê Mabênê Bajaran de xebatanê xo dewam keno. Ca de Çarekerdişo ke mabênê welatî û dezgeyanê eleqedaran de rolê pirdî de yo, demê 4 aşman de "res û resê mabênê bajaran, bicakerdiş, xizmetê sosyalî, park û baxçeyî, rayîr, awe, kanalîzasyon" de muracaatê waştiş, pêşnîyaz û gazinê 5 hezar kesan girewtî. Muracaatî, beşanê eleqedaran rê ameyî şawitene û bi çarekerdene.

170 hezar vengdayîşan rê cewab ame dayene

Beşê Ca de Çarekerdişî, Merkezê Vengdayîşî yê Alo 153î zî heme xeberdayîş, pêşnîyaz, gazin û waştişê ke welatîyan ra yenê, bi lezûbez nirxneno û ca de cewabê welatîyan dano. Na çarçewa de 4 aşmanê peyênan de Merkezê Vengdayîşî yê Alo 153î de 170 hezar û 373 vengdayîşan rê cewab ame dayene.

Ca de Çarekerdiş cayê Dîyar Masa de yo

Sereka Daîreya Çapemenî, Weşan û Têkilîyanê Şarî Berîvan Guneş ke derheqê xizmetan de ke ameyê kerdene, melumat da, va ke înan nameyê beşî ke Dîyar Masa bî, kerdo Ca de Çarekerdiş û cehd kenê ke hîna zêde xizmet bidê.

'Ma waştişê 5 hezar welatîyan çareser kerdî'

Guneş ke dîyar kerd bi xebata Ca de Çarekerdişî ê welatîyan rê rî bi rî xizmet danê, wina va: "Ma sey Ca de Çarekerdişî rayîr, awe, kanalîzasyon; waştiş, pêşnîyaz û gazinê welatîyanê ma ser o beşanê eleqedaran rê malumat danê. Na çarçewa de ma bi xebata Ca de Çarekerdişî 5 hezar welatîyanê ma reyde rî bi rî qisey kerd û problem û waştişê înan çareser kerdî."

'Ma babeta çareyî de rolêk gênê xo ser'

Guneş ke dîyar kerd bi Merkezê Vengdayîşî yê Alo 153î zî ê babeta çareyî waştiş, pêşnîyaz û gazinê welatîyan de ke bajar de ciwîyenê, rolêk gênê xo ser wina dewam kerd: "Ma sey Merkezê Vengdayîşî yê Alo 153î 170 hezarî ra zafêr welatîyanê ma yê bajarî ra waştiş, pêşnîyaz, problem û gazinê ke yenê, nirxnenê û beşanê eleqedaran rê şawenê, dima qontrolê ci kenê û babeta çareyî de rolêk gênê xo ser."

Hetkarîya resî seba welatîyanê dezavantajan

Guneş dîyar kerd ke ê sey beşê Ca de Çarekerdişî welatîyanê ke dezavantajî yê, cinîyanê ke keyeyanê stargehî de manenê û wendekaran rê, resê mabênê bajaran de mesrefê bîletî danê û ardim kenê û wina va: "Ma merkezê xo yê Ca de Çarekerdişî ke termînalê otobusî de yo, tede seba ke ma turîzmî rê ardim bikerê, welatîyanê ke teber ra yenê, înan ardim kenê.  Sewbîna ma turîstanê ke yenê bajarê ma, înan rê zî xizmetê rehberîye danê."