Şaredarîya Amedî ya Şaristanê Girdî, seba 21ê Sibate Roja Ziwanê Dayîke ya Dinya qezaya Sûr de esnafan rê tabelayê berî yê bi kirmanckî vila kerdî.

Serekîya Daîreya Karanê Kultur û Sosyalan a Şaredarîya Şaristanê Girdî, Mudirîya Kulturî ya Şaredarîya Sûrî reyde seba 21ê Sibate Roja Ziwanê Dayîke ya Dinya Cadeyê Gazî yê qezaya Sûrî de aktîvîteyek organîze kerd.

Aktîvîteyî de Hemşaredarê Şaredarîya Sûrî Adnan Orhan reyde Sereka Daîreya Karanê Kultur û Sosyalan a Şaredarîya Şaristanê Girdî Zeynep Yaş, Sereka Daîreya Çapemenî, Weşan û Têkilîyanê Şarî Berîvan Guneş û endamê meclîsî beşdar bîyî.

Aktîvîte de erbane reyde esnaf û şarî rê broşurê kirmanckî, tabelayê berî yê ke ser o "akerde-padaye" nusîyayo, kokartê ke hîsdarîya ziwanî îzeh kenê û stîckerî vila bîyî.

Hemşaredarê Şaredarîya Sûrî Orhan û serekê daîreyanê Şaredarîya Şaristanê Girdî ke esnafî reyde sohbet kerd, ehemîyetê ziwanê dayîke îzeh kerd û tabelayê ke xo reyde ardî, vila kerdî.