Şaredarîya Amedî ya Şaristanê Girdî, seba ke cinî û gedeyî tarîxê bajarî û mîrasê kulturî bişinasnê gêrayîşê daşinasnayîşî organîze kerdî.

Mudirîya Şûbeyê Kultur û Turîzmî ya Serekîya Daîreya Karanê Kultur û Sosyalan reyde Mudirîya Şûbeyê Gedeyan a Serekîya Daîreya Xizmetanê Sosyalan, seba şinasnayîşê tarîxê bajarî, mîrasê kulturî û mintiqayanê xozayîyan, gêrayîşê şinasnayîşî organîze kerdî. Mîyanê nê hewteyî de grûbanê cîya-cîyayan reyde dewam kerd.

Mudirîya Şûbeyê Kultur û Turîzmî, seba cinîyan ke Merkezê Ciwîyayîşê Cinîyan ê Serekîya Daîreya Xizmetê Cinî û Keyeyî ra îstîfade kenê, Qezaya Gêlî programêkê gêrayîşî organîze kerd. Cinî servîsan reyde berdî Qezaya Gêlî. Rehberan reyde pîya cinîyan cayê tarîxî yê qeza dîyî û Mezelê Pêxemberan zîyaret kerdî.

Wendekarî cayê tarîxî ra gêrayî

Wendekarê Dibistana Verêne ya Bayrambaşî ya Farqînî, Lîseya Meslekî û Teknîkî ya DTSO’yî, Dibistana Mîyanêne ya Alatosunî Çinar û Sûrî ra gêrayî. Derheqê tarîxê bajarî û awanîyan de malumatî dayî wendekaran: Îçkale, Muzeya Arkeolojî, Camîyê Hz. Silêmanî, Camîyo Pîl, Dêra Surp Gîragosî, Muzeya Bajarî ya Cemîlpaşayî û Keyeyê Dengbêjan.

'Ez zaf keyfeş a, çunke mi tarîxê xo şinasna'

Gedeyan ke îfade kerd ke ê gerrayîşê tarîx û kulturî ra zaf keyfeş ê, waşt ke nê tewir aktîvîteyî dewam bikerê. Yew gedeya bi nameyê Cansu Uzan wina va: "Ez reya verêne ameya Kelaya Zerzewanî û mi reya verêne a dîye. Ez zaf keyfeş bîya. Mi zaf hes kerd çunke cayê zaf rindekî û cayê kehên ê." Deniz Altin zî wina va: "Ma ewro ameyî Kelaya Zerzewanî. Cayêko zaf rindek o. Mi hema her ca dî. Zaf rindek bî. Ez nêşkena hîsanê xo îfade bikera. Ez zaf keyfeş a."."

Aktîvîte badê îkramanê werdî ke gedeyî rê ameyî dayene, qedîya.