Mudirîya Pêroyî ya DÎSKÎ ya Şaredarîya Amedî ya Şaristanê Girdî, seba ke çimeyê awa pake yê bajarî zêde biko, kenarê Çemê Hemîdîye de xebata başkerdişê des bîranê sondajî do biko.

Mudirîya Pêroyî ya DÎSKÎ ya Amedî seba ke temînê awa şimitişî bajarî de bêro garantîkerdiş û vernîya kêmanîya awe bigîro ke aşmanê hamnanî de beno, projeyêka muhîme daye vernîya xo. Na çarçewa de, prosesê îhaleyî seba ke des bîrê sondajî yê Çemê Hemîdîye ke Qezaya Sûrî de yê û serranê 1994 û 1996 de ameyî akerdene, reyna bixebitîyê, qedîya.

Problema resayîşê awe do nêbo

Bi aktîfkerdişê bîran ke bi serran nêameyî xebitnayene yan zî binê kapasîteya xo de mendî, seba bajarî çimeyêko alternatîf û bihêz yê awa şimitişî awan bibo. Bi no hewa, hem giranîya ser çimeyanê awa nikayînî do bêro sivikkerdene, hem zî seba 13 hezar kesan ke taxe û mezrayan de ciwîyenê û awa xo şebekeyê bajarî ra gênê, resayîşê awe do bibo daîmî.

Çarçewaya projeyî de fîrmaya yê wezîfedar, do badê îmzakerdişê peymane, des rojan de xebatê saheyan dest pêbikê. Pêroyê kar û tatbîqî do mîyanê aşmêk de bêrê temamkerdene.

'Hedefê ma taqwîyekerdiş o'

Derheqê projeyî de Mudirê Şûbeyê Etud, Plan û Îdarekerdişê Projeyan ê Serekîya Daîreya Sermîyangozerî û Înşaatî yê DÎSKÎ Recep Karabulutî melumat da û va: "Bîrê sondajî yê herêma Hemîdîye demêko derg o nêameyê xebitnayene. Ma bi prosesê rehabîlîtasyonî wazenê ke nê bîran reyna bixebitnê û talebê awe ke aşmanê hamnanî de zêdîyena, ma wazenê taqwîyeyêko bihêz bidê ci.