Şaredarîya Amedî ya Şaristanê Girdî, Parka Newroze de seba şuxulnayîşê mangalî û semaweran tetbîqê vernîgirewtişî dest pêkerd.

Şaredarîya Şaristanê Girdî ke goreyê waştişê şarî ke Parka Newroze ya qezaya Baxlarî de adirê mangalî û semawerî ra, dûyî, gemar û rîskê vêşayîşê mumkinî ra nêrehet bîyê, dest bi xebate kerd û gamêka ke weşîya cugehî û şarî pawena, eşte. 

Ekîba 20 kesîye ameye ronayene

Ekîba 20 kesîye ke hetê Serekîya Daîreya Zabita û Serekîya Daîreya Park û Baxçeyan ra awan bîya, tabelayê îqazî ca kerdî û melumat dayî şarî. Badê nê melumatan ke bi anonsî ameyî vatene, melumatê fekkî dayî şarî ke mangal û semawerî veşnayî. Ekîbî, şarê ke îqazan qebul kerdî, înan rê sipas kerd.

Şar tetbîqî ra razî yo

Şaro ke parke ra îstîfade keno, dîyar kerd ke no qerar seba weşîya cugehî , bi taybetî seba gede, pîr û şaro ke dûyî ra têsîr gênê, muhîm o. Zahit Çelîko ke keyeyê xo reyde ronişeno, va: "Tîya merkezê şarî yo. Dû zerar dano dorûverî, daran û gedeyan. Ma piştgirî danê şaredarîya xo, no tetbîq ganî hîna zaf bibo."

Kontrolî do dewam bikerê

Şaredarîya Şaristanê Girdî, bi taybetî şeme û yewşeme, rojanê hefteyî yê qalabalixan de no tetbîq do dewam bikero û seba tetbîqanê ke tehdîtê weşîye yê parke kenê, nîzam kontrolan do bikera.