Îtfaîyeya Dîyarbekirî ke ameya pêtkerdiş, seba hamnanî vera şewatanê vaş û daristanan xebatê xo qedênayî.

Serekîya Daîreya Îtfaîyeya Şaredarîya Amedî ya Şaristanê Girdî, seba ke can û malê şarî vera şewatî bipawo karê xo dewam kena. Îtfaîyeya Dîyarbekirî bi xebatanê xo erebeyê neweyî, teçhîzat û personelê neweyî girewtî.

Serekîya Daîreya Îtfaîyeyî, seba aşmanê hamnanî, şewatanê vaş û daristan de amade ya.

Mudirê Şefîya Perwerdeyî yê Serekîya Daîreya Îtfaîyeyî Îhsan Gezer, derheqê tedbîranê ke vera şewatanê vaş û daristanan de ameyê girewtene de beyanat da û dîyar kerd ke rençberî wexto ke xeleyê xo arê dane dima firêzeyê xo vêşnenê, bi no hewa şewatê girdî vejîyenê.

'Hutbeyanê îneyî de do zerarê veşnayîşê firêzeyî bêrê îzahkerdene'

Gezerî ard vîrê şarî ke sey Serekîya Daîreya Îtfaîyeyî serra verêne 4 hezar 829 şewatê firêzeyan, vaş û daristanan rê mudaxele kerdî û derheqê xebatanê xo de wina qisey kerd: "Ke ma kewtî serra 2025î, ma dest pêkerd ke ma tayê tedbîran bigîrê. Tedbîran ser o ma Odayanê Ziraetî reyde qisey kerd. Mudirîya Bajarî ya Ziraetî û Mudirîya Bajarî ya Daristanî reyde qiseyê ma bîyî. Ma Mudirîya Bajarî û Qeza ya Muftîyan rê nuşte şawit ke hutbeyanê îneyî de zerarê veşnayîşê firêzeyan îzah bikerê."

Gezer, tedbîrê ke ameyê girewtene îzah kerd û dîyar kerd  "Ma aşmanê hezîran û temmuze de heme destûranê serraneyan ê personelanê xo padayî. Eynî wext de heme erebeyê xo dayî tamîrkerdene. Ma envanterê xo de 4x4 û 6x4 20 erebeyê neweyî girewtî. Eynî wext de ma dest bi girewtişê 75 personelanê îtfaîyeyî kerd. Sey îtfaîye, personel, erebe û envanterî yewbînan temam kenê"

'Cezaya veşnayîşê firêzeyî 5 rey ame zêdekerdene'

Gezer, şar vera şewatanê firêzeyî de îqaz kerd û wina dewam kerd: "Badê ke xele yeno arê dayene, ma rîca kenê ke rençberê ma firêzeyî nêveşnê. Çunke ma ke vaşî veşnenê, ma dengeyê erdî xerepnenê. Ma hetê ekolojîk ra zerar danê derûdorî. Waştişê ma şarî ra o yo ke kesî qet firêzeyî nêveşno. No eynî wext de sûç o. Ma Mudirîya Bajarî ya Ziraetî reyde qisey kerd û înan qerar girewt ke cezayî 5 rey bêrê zêdekerdene."

Gezer, şoforî û kesê ke şonê piknikî rîca kerd ke ê zî uca ke şewatê xo virazenê, temam bitefisnê û şoforî zî îzmarîtê xo nêerzê teber.