Serekîya Daîreya Park û Baxçeyan Qezaya Kayapinarî de Bulwarê Firatî û Cadeyê Abdulkadir Aksuyî de 120 darê çinarê ke ortê refuj û peyarayîran de ronîyayî, înan de mewsimê sibate ra nata nêweşîya fungalî tesbît kerdbî. Na nêweşî bi wasitayê va, pel, mîrçikan û mêsan pêro yena vilakerdene.

Daranê ke nêweşîya fungalî girewta, hetê ekîban ra bi mudaxeleyê rewî, verê ke na nêweşîye resayo kokî, rêz bi rêz ameyî tarşnayene. Tedawî de dermanê fungusîtî ameyî xebitnayene û qismê ke tede nêweşîye bî, cayêko emîn de ameyî birnayene

Eke nêweşî vila bibo nêro tedawîkerdene, di serran de darî wişk benê. Goreyê rewşa daran ke ameyê tedawîkerdene, do qerar bêro dayene ke gelo lazim o ekîbî mudaxeleyê çinaranê bînan zî bikerê yan çin o. Şaredarîya herinda ke daran bibirna, tercih kerd ke înan tedawî bika.

Muhendîsê Ziraetî yê Serekîya Daîreya Park û Baxçeyan Rojhat Çakmakî derheqê nê xebatan de va: "Ma kontrolê çinaran kerd, ma tesbît kerd ke na nêweşîya fungalî daran de est a. Nê tewir nêweşîyan de adeten dar bi temamî yenê vetiş û vîndî kerdene. La ma tesbît kerd ke na nêweşî kokî nêresaya, tena gilan ser o ya. Ma verê, Bulwarê Diclekentî û Tema Parkî de xebatê winasî kerdî û ma nê darî tarşnaybî. Amancê ma o yo ke ma tena qismê ke tede nêweşî est a bibirnê û ê daran bigîrê binê tedawî û qasê ke beno, xelas bikê. Hama zî ma vînenê ke keda ke ma daya, dermanê ke ma kenê, prosesê tedawî ke ma kenê netîce dano."