Ekîbê Cigerayîşî û Xelisnayîşî yê Binê Awe yê girêdayeyê Şaredarîya Amedî ya Şaristanê Girdî, seba mudaxeleyanê ke do bikerê ke beno ke seba hewayê germî biqewmîyê, hazirîyê xo qedênayî.

Ekîbê Cigerayîş û Xelisnayîşî yê Binê Awe ke Serekîya Daîreya Îtfaîyeyî de xebitênê û amancê xo o yo ke kesê ke awe de vîndî bîyê yan zî xetere de yê, bixelisnê, çend rojan ra ver hema ke demê hamnanî dest pênêkerdo, hazirîyê xo qedênayî.

Aşma nîsane de ekîbî şîyî Antalya û uca perwerde girewt, hûmara personelanê ekîbî zêde bî û resa 12 kesan. Ekîbî ke do beşdarê xebatanê xelaskerdiş a binê awe yê pêroyê bajarî bibê, bi perwerdeyê rindî ke girewt, ganî bieşko teberê bajarî û xizmet bido pêroyê herême.

'Ekîbanê ma yê binawe hazir ê'

Serekê Ekîbê Cigerayîşî û Xelisnayîşî yê Binê Awe Mehmet Ercan Baran, ke derheqê xebatan de malumatî dayî, va ke badê perwerdeyî ke aşma nîsane de Antalya de girewt, ekîb hîna zaf bî pispor û va, "Ekîbê ma bi hawayêko profesyonel Amedî rê xizmet biko. Binawîya xorîne, binawîya şewe, binawîya şikeftan, binawîya hezokan de zî perwerde ame dayene. Bi nê perwerdeyî êdî ekîbê ma yê binawe bi hawayêko hazir vinderte yê."

Vera talûkeyan îqaz

Baranî qeyd kerd ke Amed de seba germîya berze bitaybetî gedeyî seba ke honik bibê dekewenê awe, halê talûkeyî vejîyenê û îqaz kerd ke wa şarê ma haydar bibo. Baran vatişê xo wina qedênayî: "Amed wina yew herêm a ke awe, gole, çem û bendawî tede est ê. Ma keyeyan ra wazenê; gedeyanê xo, bitaybetî cayê ke awe xorîn a, dûrî vindarnê. Seke her kes zano, ma zaf nêzdîyê Royê Dîcleyî yê. Ma ganî dîqet bikê.