Hemşaredarê Şaredarîya Amedî ya Şaristanê Girdî Serra Bucak û Dogan Hatunî, îfade kerd ke ê aştîye de hêvîdar ê û va "Barê ma giran o, berpirsîyarîya ma gird a la ma do xebatanê xo hîna zêde bikê."

Partîya Seypêyî û Demokrasî ya Şaran (DEM Partî) Kombîyayîşê Rayberîyanê Herêmkî yê Demokratîkan ê Wextê Mabênî organîze kerd. Kombîyayîşî de ke Merkezê Kultur û Kongreyê Çand Amedî de ame kerdene, Hemşaredarê Şaredarîya Amedî Şaristanê Girdî Serra Bucak û Dogan Hatun, Hemserekê Pêroyî yê DEM Partî Tuncer Bakırhan, Hemserekê Pêroyî yê Partîya Herêmanê Demokratîkan (DBP) Keskin Bayındır, Hemşaredarê Şaredarîya mardînî ya Şaristanê Girdî ke cayê înan qeyûm ame tayînkerdene Devrîm Demîr û Ehmed Turk, Hemşaredara Şaredarîya Wanî ya Şaristanê Girdî Neslîhan Şedal û hemşaredarê şaredarîyan beşdar bîyî.

Hemşaredar Hatun: Ma hêvîya xo gird kerda

Hemşaredar Dogan Hatunî ke akerdişê kombîyayîşî de qisey kerd, beşdarî silam kerd û îfade kerd ke ê serrêk peye xo de verdaya, serkewtişê înan o tewr gird o yo ke înan her tim hêvîya xo gird kerda. Hemşaredar Hatun, îfade kerd ke ê hem xîzmetê şarî de hem zî aştîye de hêvîdar ê û va "Eke ma na hêvîye zerrîya xo de gird bikê, ma hêvî kenê ke serkewtiş do yê ma bibo.”

Hemşaredare Bucak: Nirxandayîşî do fehmê şaredarîya ma biqewet bikê

Hemşaredare Serra Bucak, dîyar kerd ke ê kombîyayîşê rayberîyanê herêmkî kerdî û va "Di rojî înan hemşaredaranê ma, vervatoxanê ma, Hemserekê Pêroyî yê DEM Partî reyde serrêk nirxnaya. Nê nirxandayîşî famê şaredarîya ma ya demokratîke, komelkî, azadîwazîya cinîyan û ekolojîk do biqewet bikê."

Kombîyayîşê Rayberîyanê Herêmkî yê Demokratîkan ê Wextê Mabênî, badê nîşandayîşê sînevîzyonî bê çapamenî dewam kerd.