Akerdişê kombîyayîşê meclîsî de Hemşaredara Şaredarîya Amedî ya Şaristanê Girdî Serra Bucak qisey kerd û beyan kerd ke şaredarîyan de kontrolê awanîyan hîna bidetay û bicîddî do bêrê kerdene û waşt ke şaredarî û rêxistinê meslekanê eleqedarî prosesê ruhsatê îskanî hîna bidetay biramê.

Meclîsê Şaredarîya Amedî ya Şaristanê Girdî, kombîyayîşê asayî yê aşma hezîrane yo verên salona meclîsê şaredarîye de viraşt Kombîyayîşî de ke Hemşaredara Şaredarîya Şaristanê Girdî Serra Bucak serekîye kerde, endamê meclîsî zî beşdar bîyî.

Mesajê serweşîye seba şewatî

Hemşaredare Bucak akerdişê kombîyayîşê meclîsî de qisey kerd û seba şewatî ke Qezaya Kayapinar Taxa Firatî de Sîteyê Rojava de vejîya ard vîrardene û va: "Çi heyf ke şaristanê ma de facîayêka şewatî vejîyaye û na facîa de çi heyf ke eynî keyeyî ra 4 însanê ma şîyî heqîya xo. Seba înan ez Homa ra rehmet û keyeyanê înan rê zî sabir wazena."

Hemşaredare Bucak dîyar kerd ke nê wextî ra dima şaredarîyan kontrolê awanîyan hîna bicîddî do bibê û wina dewam kerd: "Prosesê ruhsatê îskanî hem şaredarîyanê qezayanê ma de û odayanê meslekanê eleqedaran de hîna bidetay û hîna bicîddî bibê. Çunke ruhsatê ke awanîyan rê yenê dayene çi heyf ke serran ra dima bi hewayêko kiştox vejîyeno vernîya ma."

"Encamê cigêrayîşî ma şarî reyde do pare bikê"

Hemşaredare Bucak îfade kerd yewîneya îtfaîye cigêrayîşê îdarî bilez do biqedêna û encamanê ey zî şarî reyde do pare bika.

Hemşaredare Bucak, peynîya qiseykerdişê xo de Serekê Şaredarîya Manisa ya Şaristanê Girdî Ferdi Zeyrek ke ceyran o girewtbî û nexweşxane de merd, seba ey zî rehmet û serweşîye waşt.