Bi serkêşîya Şaredarîya Amedî ya Şaristanê Girdî cenazeyê hunermende Ayşe Şan ke ame Amed, bi beşdarîya Hemşaredaranê Amedî yê Şaristanê Girdî Serra Bucak û Dogan Hatunî teyaragehî ra ame girewtene û merasîmî ra dima Goristanê Yenîkoyî de ame nimitene. Hemşaredaran dîyar kerd ke do seba ke heme hunermendê Amedijî ke bajaranê bînan ameyî nimitene, do bixebitîyê ke bîyarê bajarê înan.

Ayşe Şana ka muzîkê kurdkî de sey “Keybanûya Bêtace” yena naskerdene, 29 serran ra dima cenazeyê aye ame Amed. Eyşa Şana ke 18ê Kanûne 1996î de Îzmîr de şîybî heqîya xo, cenazeyê aye bi beşdarîya hemşaredaranê Amedî Teyaragehê Amedî ra ame girewtene û Goristanê Yenîkoyî de ame nimitene. Cenaze, hetê hemşaredaranê Amedî, hemşaredara Wanî ya ke herinda aye de qeyûm ameyo tayînkerden, parlamenterî, keyeyê aye û sewbîna temsîlkaranê partîyanê sîyasîyan û şarî ra ame pêşwazîkerdene.

Bi serkêşîya cinîyan cenaze ame berdene

Cenaze bi serkêşîya Hemşaredare Bucak û cinîyan seba ke bêro nimitene ame berdene. Merasîmê yadkerdişî ra dima cenaze ame nimitene. Definkerdişî ra dima mezelê aye ser o deyîrê aye ameyî goşdarîkerdene û vilî ame ronayene.

‘Êdî emanetê kurdan a’

Murat Kesen ke lajê Eyşa Şan o û yadkerdişî de qisey kerd, herkesî rê sipas kerd û îfade kerd ke Eyşa Şan êdî emanetê kurdan û hemşerîyanê aye ya.

‘Zaf dej û surgunî ameyî ciwîyayene’

Dostanê keyeyî yê Eyşa Şan ra Yuksel Avşarî zî bale ante ser o ke ardişê cenaze de keda herkesî est bîya û va “No, waştişê şarî bî, şarê kurd ser zerrî û wîjdanê xo wayîrîye keno aye rê. Werrekna 30 serran ra ver ma ardêne tîya. Zaf dej û surgunîye ame ciwîyayene.”

Hemşaredara Bucak: 2007î ra xebate yena kerdene

Hemşaredara Amedî Serra Bucak ke yadkerdişî de qisey kerd, îfade kerd ke 2007î ra yo ke xebatêk hetê Platformê Yewîya Cinîyanê Kurdan ra yena kerdene û va: “Ma do mezelê aye rê wayîrîye bikê, êdî a keyeyê xo de ya, welatê xo de ya. Coka ma zaf keyfweş û sereberz ê.”

Hemşaredar Hatun: Eyşe Şan agêraye herra xo

Hemşaredarê Amedî yê Şaristanê Girdî Dogan Hatunî zî îfade kerd ke Eyşe Şan êdî agêraya herra xo û va, “Mêmanîye qedîyaye, agêraye herra xo. Ma soz danê ke heme hunermendê ma yê ke cenazeyê înan tîya de nîyo, ma do bixebitîyê ke înan bîyarê tîya. Hesretîtya 29 serran qedîyaye. Seba bi nameyê şarê xo her kesî rê sipas kenê. Ma do wasîyetê heme hunermandanê xo bîyarê ca.”

Qiseykerdişan ra dima yadkerdiş qedîya.