Şaredarîya Amedî ya Şaristanê Girdî, seba gedeyanê qeza û taxanê dewan ke çalakîyanê kultur û hunerî ra dûrî yê, Rojê Tiyatroyî yê Gedeyan ê Gêrayoxî Licê, Gêl û Karaz de viraşt.

Serekîya Daîreya Xizmetanê Kultur Komelkîyan a girêdayeyê Tiyatroyê Şaristanî yê Şaredarîya Amedî ya Şaristanê Girdî (DBŞT) çarçewaya Rojanê Tiyatroyî yê Gedeyan ê Gêrayoxî de Licê, Karaz û Gêl de gedeyan kayanê tiyatroyî reyde ardî têhet. Qezayan de grûbê jongloran kortej viraştî û gedeyî dawet kerdî ke beşdarê rayîrşîyayîş û kayan bibê.

Licê de kayê Nisko ame kaykerdene

Merkezê Licê de karkerdoxê ke gedeyî kom kerdî, heta Parka Medenî Yildirimî gedeyên reyde bi çapik û deyîran rayîr şîyî. Parke de; kayê Nisko ame kaykerdene.

Grûba jonglor gedeyan reyde ameye têhet

Qezaya Karaz Taxa Çaytepe ya dewe de grûba SOS Jonglor gedeyan reyde ameye têhet. Gedeyê ke seba çalakîye kom bîbyî mirdîya xo keyf kerd.

Qezaya Gêl de Parka Meydanî de gedeyê ke kom bîyî, grûba jonglor Mavî Mask û kayê Kirmanckî Vewremerdimî yê Merkezê Hunerê Gedeyan ê Amedî temaşe kerd.

Rojê Tiyatroyî do dewam bikê

Rojê Tiyatroyî; qezayanê Pîran, Pasûr, Çêrmuge, Şankûş, Bismil, Çinar, Hêni, Erxenî, Hezro û Farqîn de do dewam bikê. Kayê tiyatroyî, her roj hirê qezayanê cîyayan de parkan de saet 19:00î de do bêrê sahnekerdene.