Mudirîya Pêroyî ya DÎSKÎ yê Şaredarîya Amedî ya Şaristanê Girdî, Taxa Narlîca ya Pasûr de seba çimeyê awe 2 hezar metre xeta awa şimitîşî ya newîye ronaye û problemê awe yê 270 keyeyan çareser kerd.

Mudirîya Pêroyî ya DÎSKÎ, Taxa Narlîca ya girêdayeya Qezaya Pasûr de badê erdlerzanê 6ê Şibate 2023î yê Mereşî, seba ke binawanî xira bîyî û çimeyê awe ziwa bîyî, seba awa şimitîşî problemêko gird vejîya meydan. Seba ke temînkerdişê awe ya bêvindertîye ekîbanê Şefîya Şûbeyê DÎSKÎ yê Pasûrî xebate daye destpêkerdene.

270 keyeyan rê awa şimitîşî ameye temînkerdene

Taxa Narlîca de teqrîben 2 hezar kesî ciwîyenê û 270 keye yê, bi xebata ke ameye kerdene reyna awa şimitîşî ya bêvindertene resaye şarî. Şarê taxe, keyfweşîya xo seba xîzmetî îfade kerd û ekîbanê DÎSKÎ rê sipas kerdî.

'Çimeyo newe ame viraştene'

Şefe Şûbeyê DÎSKÎ yê Pasûrî Semîh Çelîkî îfade kerd ke taxe de çimeyê awe zuwa bîbî seba ney çimeyêko newe viraşt û va: "Na çarçewa de 2 hezar metre dergîye de, borîyanê 50. reyde xetêka newîye ya awa şimitîşî ronaye. Seba ke ma şarê ma rê xîzmetêko başêr bikê xebatê ma do dewam bikê."