Hemşaredara Şaredarîya Şaristanê Girdî Serra Bucak ke Qezaya Hêni de muxturan reyde ame têhet, îfade kerd ke ê dewan de seba veşnayîşê firêzeyan muxturan ra hîsgirî pawenê.

Şaredarîya Amedî ya Şaristanê Girdî, goreyê fehmê beşdarîye têhetameyîşanê muxturan dewam kena. Na çarçewa de Hemşaredara Şaredarîya Şaristanê Girdî Serra Bucak, Hemşaredarê Şaredarîya Hêni Besîle Narîn û Hamdullah Demîrî reyde pîya Salona Konferansî ya Şaredarîya Hêni de muxturanê taxanê qeza reyde ameye têhet.

Hemşaredarê Şaredarîya Hêni kombîyayîşî de qiseya destpêkî kerd û va ke hedef o yo ke problemê qeza muxturan reyde pîya tesbît bibê û nê probleman rê çareyê hemparî vejîyê meydan.

Seba veşnayîşê firêzeyan îqaz

Kombîyayîşî de ke Hemşaredare Serra Bucak qisey kerd, bale ante rojanê peyênan de şewatanê qeza ser o û îfade kerd ke şewatî bîyê problemêko gird. Hemşaredare Bucak va ke têkoşînê şewatî de berpirsîyarîya muxturan zaf gird a û va: "Ganî dewijê ke firêze veşnenê û wayîrê erdan bêrê îqazkerdene. Na babete de ma muxturanê xo yê qîmetinan ra hîsgirî pawenê."

Hemşaredare Bucak: Serekîya Daîreya Îtfaîye yena xurtkerdene

Hemşaredare Bucak îfade kerd ke demê qeyyûmî de yewîneyê ke tewr zaf zarar dîyo, înan ra yew Sekîya Daîreya Îtfaîye ya û va ke seba xurtkerdişê daîre reyna xebatan dest pêkerd. Na çarçewa de Hemşaredare Bucak ke îlan kerd do 75 personelê neweyî bigîrîyê, va: "Ma ekîpmananê kêmîyan tesbît kenê. Personelê ma bes nîyê. Û cayê şewatî zaf rîskîn ê. Komelî de na babete de hîsgirîyêka cîdî çin a. Coka ganî ma dewan de zî perwerdeyê şewatî dest bikê."

Kombîyayîşî de dima muxtaran qisey kerd û bale ante problemanê sey rayîr, kanalîzasyon, dermankerdişî, binawanî û dingî ser o û çareserîyê vatî.

Zîyaretê Şaredarîya Hêni

Hemşaredare Bucak, têhetameyîşê muxtaran ra dima Şaredarîya Hêni zîyaret kerd. Hemşaredare Bucak, Hemşaredarê Şaredarîya Hêni Besîle Narîn û Hamdullah Demîr ra melûmatê xebatanê qeza girewtî.