Hemşaredarê Şaredarîya Amedî ya Şaristanê Girdî Dogan Hatun, beşdarê aktîvîteya aşûreyî bî ke Komela Kulturî ya Pîr Sultan Abdalî organîze kerdbî û va "Aştî heqê Kurdan, Tirkan, Ereban, Çerkezan, Sunîyan o."

Hemşaredarê Şaredarîya Şaristanê Girdî Dogan Hatun, beşdarê aktîvîteya aşûreyî bî ke Şûbeyê Amedî yê Komela Kulturî ya Pîr Sultan Abdalî (PSAKD) organîze kerdbî. Aktîvîte de ke hemşaredarê şaredarîyanê qezayan, endamê meclîsî û endamê komele beşdar bîyî, Hemşaredara Şûbeyê PSAKD’yî Ayfer Artan ke qisey kerd, beşdaran rê sipas kerd û va roja aşûreyî manayêko xorîn gêna xo mîyan. Artan ke îfade kerd ke aşûre qazanê yewbîyayîş û têkoşînî yo, va ê do sifrayê aştîye yê nê welatî de bibê û ver bi aştî û sey pêyî şêrê.

Hemşaredar Hatun: Ma hêvîyanê aştîye gird bikê 

Hemşaredar Hatunî ke aktîvîte de qisey kerd, înanê ke qazanê aşûreyî girêna û venga aştîye da, înan rê sipas kerd û wina va: "Hezar û 300 serrî verê Kerbela de senî vengê mazlûman Huseyn bî, ewro zî Rojhelatê Mîyanênî de vengê mazlûman est o. Her cayê Rojhelatê Mîyanênî Kerbela yo. Cayêk çin o ke tede şer nêbo. Xeylê Yezîdî est ê la sey Huseynî, Alîyî zî zaf ê. Ewro zerrîya ma de hêvîyê girdî afirnayî. Ma ganî hêvîyanê înan gird bikê. Aştî heqê her kesî yo, heqê Kurdan, Tirkan, Ereban, Çerkezan, Sunîyan o."

'Cuyêka newa yena awankerdene' 

Hemşaredar Hatunî merasîmê vizêrî ke Silêmanîye de bî, ard xo vîrî, wina dewam kerd: "Cuyêka newa yena awankerdene. Ganî her kes na cuya newa de xo bi rengê xo, bi bawerîya xo xo bivîno. Ma ganî hem birîn û neheqîyanê Kerbela qebul bikê hem zî yê Madimakî, Meraşî, Roboskîyî bikê û birînanê xo derman bikê.”

Aktîvîte de badê cemî, şarî rê aşûre ame vilakerdiş.