Şaredarîya Şaristanê Girdî, çarçewaya protokolê bi Baroya Amedî de ke seba cinîyanê marûzê şîdetî mendeyan xizmetê mişewrî û piştîya huqûqî bêro dayene, 5 aşman de 733 cinîyan muracatê hetkarîya edlî kerd.

Şaredarîya Amedî ya Şaristanê Girdî xebatanê xo yê vera şîdetê cinîyan ser o dewam kena. Gamanê DBB’yî yê nê warî de tewr muhîman ra yew zî "Protokolê Hemparîye yê Hetkarîya Edlî ya Cinîyan û Xizmetê Perwerdeyî yê Personelanê Şaredarîye" yo ke mabênê Merkezê Heqanê Cinîyan ê Baroya Amedî de ame îmzakerdiş.

733 cinîyan muracat kerd 

Avukate Cansel Talay ke Temsîlkara Merkezê Heqanê Cinîyan ê Baroya Amedî ya, derheqê muracatanê piştîya edlî de rapor hazir kerd. Goreyê raporî mabênê 1ê Êlule 2024 û 28ê Şibate 2025î de Yewîna Hetkarîya Edlî ya Baroya Amedî rê 733 cinîyan muracat kerd.

Tewrê şîdetî ke cinîyî tewr zaf marûzê ci manenê şîdetê psîkolojîk o. No tewrê şîdetî bi 570 muracatan teşkîl keno. Şîdetê psîkolojîkî ra dima bi 486 muracatan û şîdetê ekonomîkî, seba şîdetê fîzîkî muracatê ke ameyî kerdene 442 hebî yê.

Tewr zaf muracat seba dawayanê caverdiş û ferî 

Eke ma waştişanê piştîya huqûqî ra biewnîyê tewr zaf muracet seba dawayanê caverdiş û ferî ameyî kerdene. Raporî de dîyar bî ke cinî warê gêrayîşê heqan de qerardar ê la prosesê resnayîşê edaletî bi zehmetîyanê ekonomîkan asê manenê. Coka bale ame antene ke ganî xizmetê hetkarîya edlî bêrê xurtkerdene.