Şaredarîya Amedî ya Şaristanê Girdî, bi munasebetê Aşma Muherremî 20 Hezar Kesan rê Aşûre vila kerd

Şaredarîya Amedî ya Şaristanê Girdî, bi munasebetê Aşma Muherremî aktîvîteyê ke 4 cayanê cîya-cîyayan ê şaristanî de organîze kerdî, tede 20 hezar kesan rê aşûre vila kerd.

Serekîya Daîreya Xizmetanê Sosyalan, seba Aşma Muherremî cayanê cîya-cîyayan ê şaristanî de aktîvîteya aşûreyî organîze kerd. Çarçewaya aktîvîte de Meydanê Berê Koyî, Parka Koşuyolu, Nêweşxaneyê Perwerde û Cigêrayîşî yê Gazî Yaşargîlî, Nêweşxaneyê Unîversîteya Dîcle de standî ameyî ronayene. Aktîvîte de ke eleqeyêko zaf bî, 4 cayanê cîya-cîyayan de 20 hezar kesan rê aşûre ame vilakerdiş.

Sema û beytî

Programo ke Meydanê Berê Koyî de ame organîzekerdene, tede Şûbeyê Amedî yê Komela Kulturî ya Pîr Sultan Abdalî (PSAKD) sema çarnayî û beytî ameyî wendene.

Aktîvîteya Unîversîteya Dîcleyî de Wekîlê Hemşaredarê Şaredarîya Şaristanê Girdî Ayhan Karatekîn, aktîvîteya vera Nêweşxaneyê Perwerde û Cigêrayîşî ya Gazî Yaşargîl de Wekîla Sekreterê Pêroyî Ozlem Tekîn, aktîvîteya Meydanê Berê Koyî de Hetkara Sekreterê Pêroyî ya Şaredarîya Şaristanê Girdî Zerîn Turk, aktîvîteya Parka Koşuyolu de zî Hetkarê Sekreterê Pêroyî Ozgur Yildiz û endamê meclîsî, serekê daîreyan û temsîlkarê rêxistinanê sivîlan beşdar bîyî.