Sporkara ke binê banê Şaredarîya Amedî ya Şaristanê Girdî de xebatanê xo dewam kena Nazlî Bozkurt, Şampîyonîya Karate ya Tirkîya de kategorîya pîlan giranîya 55 kg de Tirkîya de bîye hirêyine.

Linga çarine ya Lîga Premîer a Karateyî ya Tirkîya ke hetê Federasyonê Karateyî yê Tirkîya ra Mûş de ame organîzekerdene. Organîzasyono ke 2 rojan dewam kerd, tede gelekî bajarê Tirkîya ra nêzdîyê hezar sporkarî beşdar bîyî. Sporkara ke binê banê Serekîya Daîreya Xizmetanê Ciwan û Sporî ya Şaredarîya Amedî ya Şaristanê Girdî de xebatanê xo dewam kena Nazlî Bozkurt zî mabênê sporkaran de bîye ke beşdarê Lîga Premîer a Karateyî ya Tirkîya bîyî.

Sporkarê ke bajarê cîya-cîyayan ê Tirkîya ra ameyî, goreyê grûbanê emrî kategorîyanê cîya-cîyayan de mucadele kerd.

Bozkurt, kategorîya pîlan giranîya 55 kg de reqîbanê xo yê xurtî pey de verdaye û Tirkîya de bîye hirêyine.

Badê qedîyayîşê linga çarine ya Lîga Premîer a Karateyî ya Tirkîya, sporkaranê ke turnuva de derece girewt, înan rê merasîmêk de medalya û kupayî ameyî dayene.

Fînal Do Amed de Bibo 

Goreyê taqwîmê Federasyonê Karateyî yê Tirkîya, etaba fînalî ya Lîga Premîer a Tirkîya do mabênê 1-9ê Tebaxe de Amed de bêro viraştene. Sporkarê ke lîge de pûanî arêdayî, na etabe de do seba şampîyonîye mucadele bikê. Badê fînalî rêzkerdişo pêroyî do aşkera bibo.