Îtfaîyekar Haydar Oz ke Qezaya Erxenî de wexto şîyêne mudaxeleyê adirî qeza de bi giranî birîndar bî û nexweşxane de şî heqîya xo, bi merasîmêk ke Hemşaredarî Serra Bucak û Dogan Hatun beşdar bîyî cenazeyê ci ame definkerdene.

Qezaya Erxenî ya Amedî de, 28ê Temmuze de wexto ke şîyêne adirê ke mintiqaya daristanî ya Taxa Degirmendere de vejîyabî, bipeysno, erebeya Serekîya Daîreya Îtfaîye qelbîya û 3 îtfaîyekarî birîndar bîyî. Îtfaîyekarê birîndarî, Nêweşxaneyê Dewlete yê Erxenî de tedawî bîyî. Îtfaîyekar Haydar Oz (39) ke rewşa ci giran bî, Nêweşxaneyê Perwerde û Cigêrayîşî yê Gazî Yaşargîlî rê ame şawitene û emelîyat bî. Haydar Oz bi heme mudaxeleyan şî heqîya xo.

Seba Haydar Ozî Qezaya Erxenî de merasîmê cenaze ame organîzekerdene. Merasîmî de ke Goristanê Gulbaranî de bî, Hemşaredarê Şaredarîya Amedî ya Şaristanê Girdî Serra Bucak û Dogan Hatun, endamê keyeyî, Hemşaredarê Şaredarîya Erxenî Bîrsen Azak Bayar û Şîyar Guldîken, Hetkarê Sekreterê Pêroyî Serdar Bakiroglu, serekê daîreyan, endamê meclîsî û personelê Serekîya Daîreya Îtfaîyeyî beşdar bîyî.

Badê ke wezîfeyê dînî ameyî ca, cenazeyê Haydar Ozî ame definkerdene.

Hemşaredarî Bucak û Hatun, badê merasîmî şîyî Keyeyê Tazîyeyî yê Hecî Necla Sever yê Şaredarîya Erxenî û keyeyî rê serweşîye waşte.