Hemşaredara Şaredarîya Şaristanê Girdî Serra Bucak, Japonya de beşdara "Merasîmê yadkerdişî yê serra 80. ya felaketê Hîroşîma" bîye. Hemşaredar dima de do Nagazakî de beşdarê "Konferansa Pêroyî ya Tora Şaredaranê Aştîye" bibo û qisey bikero.

Hemşaredara Şaredarîya Amedî ya Şaristanê Girdî Serra Bucak û endamê ma yê meclîsî Umut Aytaş, bi munasebetê serrgêra 80. ya eştişê bombeya atomî yê bajaranê Hîroşîma û Nagazakî yê Japonya yê demê Şerê Dinya yê Dîyinî de, seba beşdarbîyayîşê aktîvîteyanê vera çekanê nukleer û têkilîyanê cîya-cîyayan şîyî Japonya. Hemşaredare Serra Bucak nê warî de do mabênê 7-10ê Tebaxe de beşdarê Konferansa Pêroyî ya Mayors for Peace (Tora Şaredaranê Aştîye) bibo ke bajarê Nagazakî yê Japonya de yena organîzekerdene.

Yewîna rayberîyanê herêmkîyan a mîyanneteweyî ke 1982î de bi teşebbusê Şaredarê Hîroşîma yê o demî Takeshî Arakî ame ronayene û Şaredarîya Amedî ya Şaristanê Girdî zî endama ci ya, bi hedefê dinyayêka bê çekanê nukleeran û aştîya menda, xebatan kena. Konferans do bi na şîare şaredaranê pêroyê dinya reyde pîya bêro kerdene.

Konferansa ke bi temaya "Ver Bi Dinyayêka Bê Çekanê Nukleeran: Ameyoxê Aştîyane ke Ma Sey Hemwelatîyê Cîhanî Xeyal Kenê" yena organîzekerdene do çar rojî dewam bikero. Konferanse de babetê sey bêçekbîyayîşê nukleerî, awankerdişê bajaranê biemnîyet û pêtan, vilakerdişê kulturê aştîye do bêrê tehlîlkerdene.

Hemşaredar Bucak do pêşkêşî bikero 

Hemşaredara Şaredarîya Şaristanê Girdî Serra Bucak nameyê Şaredarîya Amedî ya Şaristanê Girdî do 9ê Tebaxe de roniştişê hirêyinî de qisey bikero. Hemşaredar Serra Bucak do "Roniştişê aktîvîteyanê kulturî, huner, muzîk û sporî" de ke bi moderatorîya Weqfa Kulturê Aştîye ya Hîroşîma yena viraştene qisey bikero û derheqê xebatanê kulturî yê temaya aştîye ke bajarî de yenê kerdene, pêşkêşîyêk bikero. Çarçewaya roniştişî de rayberanê herêmkî yê welatanê cîya-cîyayan ra beşdarî pîya do tecrubeyanê xo pare bikê û îmkananê hemparîye do bêrê erjnayîş.

Konferanse do 10ê Tebaxe de bi Heyetê Pêroyî biqedîyo. Nê roniştişî de dîyarkerdişê plananê karan ê demê ameyoxî, weçînayîşê endamanê heyetê îcrakarî û qebulkerdişê "Beyannameyê Nagazakî" do bêro kerdene.