Şaredarîya Şaristanê Pîlî ya Amedî, Atolyeya Pedanê Şutebaran (pedê ke eşkenê bêrê şutene) bi temayê "Ez yewî xo rê, yewî embaza xo rê derzena" Qezaya Rêzan, Keyeyê Baxî de arde ca.

Serekîya Dayîreyê Xizmetanê Cinî û Keyeyan, Atolyeya Pedanê Şutebar a xo ya ke bi sloganê "Bi Çerxê Xo Vurîyenîme" rayîr ra bena, domnena û kena vila. Atolye bi hemkarîya Mudirîya Polîtîkayanê Cinîyan ê Şaredarîya Rêzan ameye caardene û bi temayê "Ez yewî xo rê, yewî embaza xo rê derzena" Taxa Rêzan de, Keyeyê Baxî yê Şaredarîya Rêzan de ameye kerdene. Cinîyê ke Merkezê Ciwîyayîşî ra îstîfade kenê beşdarî Atolye bîy.

Atolye de cinîyan pêşkêşî goşdarite û dima gore bi hewcedarîyanê xo pedê şutebarî deştî.

'Ma Do Xebatêka Kolektîfe Bikerîme'

Perwerdekar Sevda Kayar Görer derheqê xebatanê atolye de zanitişî dayî û îfade kerd ke înan xebatêka kolektîfe do bikerê û piştî bidê yewbînan û vat: " Aşma çeleyî ra bîyo ma kampanyaya 'Bi Çerxê Xo Vurîyenîme' daye destpêkerdene. Ma sey hedef nayîbî xo ver ke Atolyeya Pedanê Şutebar a ma akerîme û na Atolye bikerîme vila. Na xebate de ma Semtê Ben û Senî sey mintiqeya pîlot weçinaye. Ma di atolyeyê xo tîya de kerdî. Ben û Sen ra dima programanê ma Merkezê Cuya Cinîyan ê Rêzan reyde, Yenîkoy, Kayapînar Kuçe û Sur Lalebey de dewam kerd."

'Ewro Ma Bi Temayêkê Cîyayî Dest Pêkerd'

Görer îfade kerd ke amancanê înan bingehîyan ra yew zî derheqê tabuyê reglî de qisey kerdiş yo û wina qisey kerd: "Cinîyan reyde bi nê hewayî sohbetî ênê kerdene, tecrubeyî ênê pare kerdene. Ma derheqê weşîya bergirewtişê cinîyan de qisey kenîme, derheqê xeletîyan de reyna raştkerdişî ênê kerdene. Heftê ra verî ma bi Şaredarîya Kayapînarî atolye kerdîbî. Ewro zî ma bi temayêkê cîyayî dest pêkerd. Ma bi temayê 'Ez yewî xo rê yewî embaza xo rê derzena' Şaredarîya Rêzan reyde atolye kerde. Yew atolyeya zaf kêfweşe bîye. Xebata ma ya ewroyî de yew amancêko taybetîyo cîya est bî. Cinîyan yew ped seba xo, yew zî seba cinîyanê Merkezê Cinîyan ê Kardelenî deşt."

Atolyeyî Do Dewam Bikerê

Atolyeyê "Bi Çerxê Xo Vurîyenîme" yê ke Merkezanê Cuya Cinîyan ê ke girêdayîyê bi Şaredarîya Şaristanê Pîlî yê de ameyê destpêkerdene, sey hedef gênê xo ver ke bal biancê xizanîya reglî ser û derheqê weşîya cinîyan de hişyarîye virazê. Atolyeyî bi hemkarîya mudirîyetanê polîtîkayanê cinîyan ê şaredarîyanê qezayan do dewam bikerê.