Şaredarîya Şaristanê Pîlî ya Amedî, Qeza Yenişehir, Kuçeya Hunerî de Standê Ca de-Çareyî rona û derheqê xizmetanê şaredarîye de waştiş û pêşnîyarê hemwelatîyan ca de goşdar kerdî.

Serekîya Dayîreyê Çapemenîye-Weşanayîşî û Têkilîyanê Şarî, seba şaredarîya beşdare, bi amanco ke metodanê ciresayîş û komunîkasyonî weşêr bikera, xebatanê xo dewam kena. Serekîya Dayîreyî na çarçiwa de Semtê Ofîsî yê Qeza Yenişehirî de, Kuçeya Hunerî de Standê Ca De-Çareyî  akerd. Personelê ke stant de wezîfedar ê, waştişê şarî goşdar kerdî û pêşnîyarê înan not kerdî. Reyna çarçiwa cigêrayîşê xizmetê Şaredarîya Şaristanê Pîlî komelî ser o çend tesîr kerdo û komel nînan senî fehm keno de, hemwelatîyan ra ame perskerdene ke ê Şaredarîye ra çi  pawenê.

Standê Ca De-Çareyî de ke Kuçeya Hunerî de yew hefte do akerde bimano, waştişê hemwelatîyan do bêrê goşdaritene.

Sereka Dayîreyê Çapemenîye-Weşanayîşî û Têkilîyanê Şarî Berivan Güneş derheqê xebatanê Standê Ca De-Çareyî de zanitişî dayî û îfade kerd ke ê personelî reyde ray û pêşnîyaranê şarî goşdarenê û waştişanê înan not kenê.

'Ma Seba Ke Şarî Goşdarîme Stant Akenîme'

Güneş îfade kerd ke xebatanê stantî de ê cehd kenê ke pêşnîyar û waştişanê hemwelatîyan bîyarê ca û vat: "Sey Şaredarîya Şaristanê Pîlî ya Amedî, seba ke waştiş, pêşnîyar, projeyanê hemwelatîyanê ma yan zî eke est ê problemanê înan goşdarîme, xebatê stantî yê ma dewam kenê. Hîna verî zî zaf noktayanê şaristanî de xebatanê stantî ke ma kerdîbî de, ma cehd kerdîbî ke pêşnîyar û waştişanê hemwelatîyanê xo bîyarîme ca. Nîka zî Kuçeya Hunerî de xebatê stantî yê ma do yew hefte dewam bikerê."

Güneş îfade kerd ke xebatanê stantî de Şaredarîya Şaristanê Pîlî ya Amedî gore bi waştiş û pêşnîyaranê hemwelatîyan, xizmetê ke kerdê îzah kenê û bultenê çapemenîye hemwelatîyan rê danê şinasnayene û vat: "Sey Şaredarîya Şaristanê Pîlî, ma bultenê çapemenîye yo ke ma yew perîyodo dîyar de weşanenîme, hemwelatîyanê xo rê kenîme vila. Hemwelatîyê ma bi naye, zaf rehet eşkenê bimusê ke Şaredarîya Şaristanê Pîlî çi xebatî kerdê."